İranlı turistlər üçün “Odlar diyarı - Azərbaycan” jurnalı nəşr olunub

Azərbaycanın İrandakı səfirliyinin təşəbbüsü və dəstəyi ilə “Eligəşt” turizm şirkəti tərəfindən fars dilində “Odlar diyarı - Azərbaycan” adlı jurnal nəşr olunub.

Jurnalda paytaxt Bakı şəhəri ilə yanaşı, regionlarımızın da turizm potensialı əks etdirilib, Azərbaycanın gəzməli-görməli yerləri, mətbəximiz və adət-ənənələrimiz haqqında geniş məlumat yer alıb.

Nəşrdə, həmçinin Azərbaycanın iqtisadiyyatı, mədəniyyəti, tarixi və memarlıq abidələri, muzeyləri və təbiəti haqqında oxuculara geniş məlumat verilib.

Qeyd olunub ki, Naxçıvan Muxtar Respublikası Azərbaycanın qədim diyarıdır. İran ilə həmsərhəd olan Naxçıvan özünün tarixi abidələri, təbiəti və coğrafi mövqeyi ilə turistlər üçün cəlbedicidir.

Jurnalda Azərbaycanda Novruz bayramı və ilaxır çərşənbənin xüsusi qeyd edilməsi barədə də maraqlı yazı var.

Bundan başqa, nəşrdə Azərbaycanda beynəlxalq idman yarışlarının keçirildiyi də vurğulanıb. Nəzərə çatdırılıb ki, Formula-1 Avropa Qran-prisi bu ilin iyununda Bakıda keçirilib.

Bakıda turistlərin xüsusilə maraq göstərdikləri “Alov qüllələri”, Nizami adına Milli Azərbaycan Ədəbiyyatı və Xalça muzeyləri, Şirvanşahlar sarayı, Atəşgah və digər tarixi-mədəni abidələr haqqında ətraflı məlumat verilib.

Mədəniyyət.- 2016.- 9 sentyabr.- S.9.