"Dərs” beynəlxalq festivalda “Ən yaxşı film” oldu

Rejissorlar Rafiq Əliyev və Cavid Təvəkkülün “Dərs” bədii filmi Rusiyanın Krasnodar diyarının Anapa şəhərində keçirilən 25-ci “Kinoşok” beynəlxalq film festivalının “KinoMalıŞok” proqramının “Ən yaxşı film” nominasiyasında qalib olub.

C.Cabbarlı adına "Azərbaycanfilm" kinostudiyasından bildirilib ki, MDB ölkələri, Latviya, Litva və Estoniyanın iştirak etdikləri festival sentyabrın 3-dən 10-dək davam edib. “Dərs” filmi festival çərçivəsində Anapa, Krımsk, Novorossiysk və Temryuk şəhərlərinin kinoteatrlarında nümayiş etdirilib.

Məktəb həyatından, yeniyetmələrin qarşılıqlı münasibətlərindən, dostluğa və həyata baxışlarından bəhs edən bədii film 2015-ci ildə Mədəniyyət və Turizm Nazirliyinin dəstəyi ilə “Azərbaycanfilm” kinostudiyasında lentə alınıb.

Filmin ssenari müəllifləri Elza Ağayeva və Anastasiya Volkova, quruluşçu operatoru Rauf Qurbanəliyev, quruluşçu rəssamı Fikrət Ələkbərov, bəstəkarı Tünzalə Ağayeva, icraçı prodüseri Vüsal Abbasov, prodüseri Müşfiq Hətəmovdur. Rolları Tamerlan Ağayev, Aliyə Əliyeva, Rəşid Əliyev, Ayna Zərbəliyeva, Nazim İbrahimov, Mənsurə Əhmədova və digərləri canlandırıblar.

Mədəniyyət.- 2016.- 16 sentyabr.- S.16.