“...Mənim
tacım, taxtım oy!”
Vətənimizi bu sayaq şimşək misralarla yad edirdi Almas İldırım!..
Onu universitetdən yarımçıq “qovmuş”,
səsini “almış”, neçə-neçə şeirini, kitabını sandıqda və ya nəşriyyatlarda dustaq,
özünü iki kərə
sürgün, İran-Turan
yollarında əsir, gizli getdiyi
karvanlarda yesir, qərib
ellər kasıbçılıqlarında “bir
həsir, bir Məmmədnəsir “etmiş” Azərbaycanı!..
Bütün bunlardan sonra o, heç də və ya o qədər də qərib olmayan bir ölkədə “...ölməyə Vətən yaxşı” bayatı-manifestli məmləkətinə xitabən yazırdı:
Nərdə məni gül qoynunda doğuran,
Xəmirimi göz yaşıyla yoğuran,
Beşiyimdə, lay-lay balam, çağıran,
Azərbaycan, mənim bəxtsiz
anam, oy!
Neçə ildir həsrətinlə
yanam, oy!.
Azərbaycanın mühacir siyasətçiləri,
qərib sənətkarları
az olmayıb.
Amma Almas İldırımzadə kimisi
az olub.
Bu şair çoxları
kimi tək elə sözün, incə hislərin, obrazların deyil, Vətən azadlığının,
vətəndaş üçün
hər nəsnədən
üstün milli istiqlal arzu-istəklərinin
də carçısı
olub.
Gələcəyin bu böyük istiqlal şairi hələ 18-20 yaşlarında
ikən öz milli kimliyini dərk edir, milli mənliyini təsdiq və sübut etməyə çalışır. Bu onun bütün hərəkət və düşüncələrində, qol və iz
qoyduğu işlərdə
hiss edilirdi. O bunu
“ailə quruculuğu”nda
da sübut edib; 25 yaşında ikən (1932-ci ildə) yaxın ətrafının
narahatlıq və narazılıqlarına baxmayaraq,
Şamaxıdan sürgün
edilmiş (əslən
Güney Azərbaycandan
olan) bir ailənin qızı ilə evlənir. Və yaxud, “hər üç misrasından biri antisovet” təhdidlərilə Aşqabada
sürgün edilmiş
bu adamın azadlıq mövzulu şeirləri elə ilk aylarda əldən-ələ
gəzir. Burada da “sovet ideologiyasına
zərərli” hesab edilən Almas İldırım təqib
və təhriklərdən
bezir və 1933-cü il iyunun
19-da “xalq düşməni”
qızı Zivər xanımla üç aylıq körpəsi Azəri götürüb
karvanla yola çıxır. Doğma
və qərib sürgün ellərində
çoxların şəxsi-ictimai
suallarını cavablandırmış
(və hələ çox cavablandırası)
bu ziyalı-şair məşəqqətlərlə dolu “məxfi karvan səfəri”ndə
“qəribə” bir sual üstə köklənir və onu nəzmə çəkir:
“Bilmirəm, yurdunu sevən bir şair
Neyçün cani kimi daim izlənir?..”
Təbii,
Almas İldırım
hələ elə o yaşında da bu sualın cavabını o karvandakıların
hamısından və
ümumbəşəri dünya
karvanındakıların çoxusundan
yaxşı bilirdi. Amma, görünür, cavabını bildiyin bəzi suallar da var ki,
onları bu dünyanın vicdanına
verməsən, olmur...
Almas İldırımın
həyatı və yaradıcılığı... Bunları “əkizlər” də adlandırmaq olar. Əgər bu mümkündürsə,
mən birincini - yəni onun həyatını “qardaş”
adlandırardım, ikincini
- yaradıcılığını “bacı”. Niyə? Ona görə
ki, onun yaşadığı məşəqqət-məhrumiyyətlərə
bu qədər dözüm, əsla bacılıq iş deyil! Amma bu dözülməz
həyat, araşdırıcılarının
da bəyan etdikləri kimi, bu mübariz şairin dilindən heç vaxt Vətən çağrılı,
yurd ağrılı məşhur “oy!” hiss-həyəcanı qopara bilməyib.
O Vətən, o yurd...
O Vətənin Azərbaycan
olduğu hamıya bəlli, yurd isə 1907-ci il
martın 25-də doğulduğu
Qala kəndi. O, 13 yaşında olanda, sonralar heç zaman barışmayacağı
sovet hakimiyyəti, insanlıqdan başqa əllərindən hər
şey gələn bolşeviklər Bakını,
Qalanı, bütün
Azərbaycanı tutdular.
Ardınca bu Vətənin
say-seçmə insanlarının,
milli duyğularının,
düşüncələrinin işğalına başladılar.
Almas İldırım
isə bəy nəslinə mənsubluğu
bir yana,
milli ruhlu əsərlərilə də
“qılınca çapdı”
və tezliklə totalitar rejimin həyata keçirdiyi müxtəlif cəza tədbirlərinin hədəfinə
çevrildi. Əvvəlcə Azərbaycan Dövlət Universitetindən (Şərq
ədəbiyyatı fakültəsi)
xaric edildi. Şeirlərində ifadə etdiyi
“bəzi məsələlər”ə
- sovet sərhədlərini
aşıb keçən
bəşəri fikirlərə,
Azərbaycan coğrafiyalı
milli ismarıclara görə Dağıstana
sürgün edilir.
Lakin orada da nə dilini,
nə qələmini dinc qoyur; “Dağlardan
xatirələr”, “Ləzgi
elləri”, “Krımda axşamlar”, “Günah kimdədir?” kimi “nadinc şeirlər” yazır. 1930-cu ildə
“bir qədər yaddan çıxmış”
hesab olunduğu Bakıya qayıdır.
Lakin burada nəşr etdirmək istədiyi “Dağlar səslənərkən”
şeirlər məcmuəsi
onu yenidən dilə-dişə salır.
Senzuradan
keçməyən bu
məcmuə şairin
Azərbaycan Yazıçılar
Birliyindən qovulmasına
da səbəb olur. Üstəlik, yenidən sürgün! Bu
dəfə daha uzağa - Türkmənistana...
...Türkmənistana “uzaq” dedim. Amma məncə, bu
söz qərib şairimizin ruhunca olmaz. Nədən ki, doğma
türk ellərindən
biri idi ora. Elə Dağıstanın özü
də doğma! Görəsən, onun məhz
həmin ünvanlara sürgün edilməsi qansız taxt-tac sahiblərinin siyasi-etnik səriştəsizliyindəndimi, ya Almasın bəxtindənmi?
Almas bir müddət Türkmənistanda
məktəb direktoru işləyir, yerli əhalinin doğması kimi tanınır, şəxsi keyfiyyətlərilə
Azərbaycan xalqı barədə gözəl fikirlər oyadır. Lakin növbəti bir azərbaycanlının oraya
gəlişinə, daha
doğrusu, göndərilişinə
qədər. Belə
ki, Aşqabada göndərilən Ələkbər
Ruhi adlı bir “QPU” agenti oradakı müşahidələrilə
belə nəticəyə
gəlir: “Almas
İldırım ideolojimiz
üçün zərərli
bir insandır...”
Başıbəlalı şair bundan xəbər tutcaq, Türkmənistanda qalmağın
çox çətin
olacağını kəsdirir
və yuxarıda dediyimiz tarixçədə
ailəsilə birgə,
İrana doğru gedən bir qaçaqmalçı dəvə
karvanına qoşulur.
Sərhədçi və gömrükçülərin gözlərinə görünməməkçün
çətin aşırım-sıldırımlar
keçib İran torpağına çatan Almas İldırım
dərhal həbs olunur. Bir aya qədər
dustaq qalan şairi bolşevik casusu hesab edərək
işgəncə verir,
istədikləri məlumatı
qoparmaq üçün
sinəsinə qədər
soyuq su içərisində saxlayırlar.
Bu işgəncə şairin səhhətində
dərin izlər qoyur, sağalmaz böyrək xəstəliyinə
mübtəla olur.
Həbsdən azad edilən şair Məşhəd şəhərinə
göndərilir, ürəyincə
iş tapa bilmədiyindən, çox
yoxsul, acınacaqlı
həyat sürür.
Bu məhrumiyyətlərə dözə bilməyən
Almas İldırım
Türkiyəyə getməli
olur. 1934-cü ildə o, Türkiyə vətəndaşlığına qəbul edilir, bir müddət katiblik, kargüzarlıqla
məşğul olur,
ibtidai məktəbdə
dərs deyir. Ömrünün son 11-12 ilini isə
“bucaq müdirliyi” (qəsəbə bələdiyyəsində)
işlərində çalışır.
1952-ci ilin 14 yanvarında
məlum “İran yadigarı”ndan - böyrək
xəstəliyindən vəfat
edir...
Bütün bu çətinliklər,
ağrı-acılarla bərabər,
bu şair -
Öz ölümsüzlüyünü də yaradırdı
Yorulmadan yazır, böyük milli gələcəkdən
danışır, milli
istiqlal ümidi ilə yaşayırdı,
Azər, Araz, Orxan, Bakıxan adlı dörd oğul böyüdürdü. Türkiyədə keçən 17 illik həyatında qəzet-jurnallarda
milli səs-nəfəsli
şeirlər, “Boğulmayan
səs”, “Azərbaycan
mahnıları” adlı
kitablar nəşr etdirir, milliyətçi-istiqlalçı
şair kimi tanınırdı. Daha çox
yaşadığı, Türkiyənin
hər yerindən daha artıq sevdiyi Elazığda isə bu adamı
el ağsaqqalı kimi
qəbul edirdilər.
Əvvəl müəllim,
sonra nahiyə müdiri işlədiyi Elazığın bütün
bölgələrində ümumən
təhsillə bağlı
böyük işlər
görür, məktəblər
açırdı...
Amma bütün iş-gücünün,
dür-düşüncələrinin başında doğma Vətən, Vətən,
Vətən! Hələ
Türkiyəyə gedəndə
yazırdı ki;
Aç
qoynunu, uzaqdan gəlmişəm, çox
yaslıyam;
Eli, yurdu çalınmış
bir qərib Qafqazlıyam.
Zənn
etmə ki, yoxsulam, Kürlüyəm,
Arazlıyam,
Bakıdan ayrılalı yaxın
zamandır, Gölcük...
Yazımın sonunda bu bəndi
elə-belədən xatırlatmıram;
bu şair Elazığda tez-tez adsız bir gölün sahilinə gedib, o göl ilə dərdləşərmiş. Bir gün Atatürkə məktub yazır ki, qürbətdə böyük bir Xəzərim var... İzn verin, adı olmayan bu gölə “Xəzər” adı verim...
Böyük Atatürk bu kiçicik göllə bağlı bu “balaca” xahişi qəbul edir və o zamandan o gölcük Xəzər adlanır...
Tahir Abbaslı
Mədəniyyət.- 2016.- 13
yanvar.- S. 13.