Musiqi məktəbinin yubiley konserti

Azərbaycan Milli Konservatoriyasında Bakı Şəhər Mədəniyyət və Turizm Baş İdarəsinin Şövkət Ələkbərova adına 20 saylı 11 illik musiqi məktəbinin 50 illik yubileyi ilə əlaqədar konsert keçirilib.

Tədbiri giriş sözü ilə məktəbin direktoru Sevda Məmmədova açaraq 28 May - Respublika Günü münasibətilə iştirakçıları təbrik edib. Sonra Bakı Şəhər Mədəniyyət və Turizm Baş İdarəsinin rəisi Vuqar Zeynalov çıxış edərək 50 illik yubiley münasibətilə məktəbin kollektivinə xoş arzularını çatdırıb.

Yubiley ilə əlaqədar tədris ocağının 11 qabaqcıl müəllimi idarənin fəxri fərmanları ilə təltif edilib.

Sonra konsert proqramı təqdim olunub. Məktəbin xalq çalğı alətləri orkestri, nağaraçalanlar və skripkaçalanlar ansambllarının çıxışları, solo nömrələr ilə zəngin proqram maraqla qarşılanıb.

Sonda Azərbaycan Milli Konservatoriyasının prorektoru Malik Quliyev çıxış edərək musiqi məktəbinin şagird və müəllim heyətini peşəkar səviyyədə təqdim olunan konsertə görə təbrik edib, kollektivə uğurlar arzulayıb.

Mədəniyyət.- 2017.- 2 iyun.- S.4.