Turizm statistikasının təkmilləşdirilməsi üzrə işçi qrupun ilk iclası

Azərbaycan Respublikası Prezidentinin 2016-cı il 27 dekabr tarixli fərmanı ilə təsdiq edilmiş “Turizm Şurası haqqında Əsasnamə”yə uyğun olaraq ölkəmizdə etibarlı turizm statistikasının hazırlanması istiqamətində müvafiq mexanizm və təkliflərin hazırlanması, turizm statistik hesabatlılıq sisteminin yaradılması, beynəlxalq TSA (Turizm Köməkçi Hesabları) sistemində tələb edilən əsas göstəricilər üzrə məlumatların əldə edilməsi üçün araşdırma və təhlillərin aparılması məqsədilə aidiyyəti mərkəzi icra hakimiyyəti orqanlarının nümayəndələrindən ibarət İşçi qrupu yaradılıb.

Mayın 30-da mədəniyyət və turizm nazirinin müavini Nazim Səmədovun sədrliyi ilə İqtisadiyyat Nazirliyi, Dövlət Miqrasiya Xidməti, Dövlət Sərhəd Xidməti, Dövlət Statistika Komitəsi, Mərkəzi Bank və digər qurumların nümayəndələrindən ibarət İşçi qrupun 1-ci görüşü keçirilib.

İclasda Nazim Səmədov Azərbaycanda turizm statistikasının hazırlanmasında inkişafın müşahidə olunduğunu, lakin buna baxmayaraq bu sahədə bir sıra həll olunmamış məsələlərin qaldığını və bu məsələlərin aradan qaldırılması istiqamətində işlərin aparılmasının vacibliyini vurğulayıb.

Bildirilib ki, ölkədə son illər turizm sahəsinə dair bir sıra islahatlar aparılıb. Bu islahatların nəticələrini müşahidə etmək üçün turizm statistikası xüsusi önəm kəsb edir. Eyni zamanda turizmin ölkə iqtisadiyyatına verdiyi töhfənin müəyyən olunması baxımından statistik hesablamaların düzgün təşkil edilməsi vacibdir.

İclasda turizmin ümumi daxili məhsulda çəkisi, xarici turistlərin sayı, onların xərclədikləri vəsaitin məbləği, turizm sahəsinə qoyulan yerli və xarici investisiyalar, xarici turistlərin gecələmələrinin sayı, getmə turistlərin sayı və s. məsələlər müzakirə edilib.

Mədəniyyət.- 2017.- 2 iyun.- S.9.