“Tariximizi öyrənək və öyrədək”

Gənclər klubu təsis olunub

Fevralın 27-də Azərbaycan Respublikasının Prezidenti yanında Bilik Fondunda “Tariximizi öyrənək və öyrədək” Gənclər klubunun təsis iclası keçirilib. Klubun təsis olunmasında məqsəd gənclərin diqqətini Azərbaycan tarixinin az öyrənilmiş səhifələrinə, xüsusən qədim və erkən orta əsrlər dövrünə aid olan Qafqaz Albaniyası irsinin qorunmasına cəlb etmək, habelə XX əsrin əvvəllərindən etibarən Azərbaycan tarixinə faciələr gətirmiş “erməni məsələsi”nin mahiyyətini - soyqırımı, terror daşıyıcısı olduğunu göstərməkdir.

İclasda çıxış edən Bilik Fondunun icraçı direktoru Oktay Səmədov klubun əsasnamə layihəsi ilə iştirakçıları tanış edib. Bu məsələ ilə bağlı fikir mübadiləsi aparılıb və tələbələrin təklifləri qeydə alınıb. Klubun strukturu, görüləcək tədbirlərin forma və məzmunu müzakirə edilib. İclasda iştirak edən fəal gənclər arasından klubun sədri və sədr müavini seçilib, onlara vəzifələri və görüləcək işlər haqqında məlumat verilib.

Toplantıda iştirak edən tanınmış tarixçi alimlər layihəni müsbət qiymətləndirib, “Tariximizi öyrənək və öyrədək” Gənclər klubuna dəstək olacaqlarını bildiriblər.

Klubun üzvləri sırasına Bakı Dövlət, Memarlıq və İnşaat, Dövlət Pedaqoji, Mədəniyyət və İncəsənət, Bakı Qızlar, Azərbaycan universitetləri və Pedaqoji Kollecin tələbələri və Bilik Fondunun könüllüləri daxildir.

Mədəniyyət.- 2017.- 3 mart.- S.15.