Mühəndis-mexanikin əl işləri

İki ilə 70 əsər yaradıb

Martın 1-də “Art Villa” sərgi salonunda rəssam Boris Şetinkinin “Non contemporary glance...” (“Qeyri-müasir baxış...”) adlı fərdi sərgisinin açılışı oldu.

Sənətsevərlər qarşısında çıxış edən müəllif özü haqqında bilgi verdi. Bildirdi ki, 1954-cü ildə Bakıda anadan olub. İxtisasca mühəndis-mexanikdir. 22 il Məişət kondisionerləri zavodunda müxtəlif vəzifələrdə işləyib. 2011-ci ildən “DQS Azərbaycan” şirkətinin direktoru vəzifəsində çalışır.

Müəllif qeyd etdi ki, iki il öncə rəngkarlıqla məşğul olmağa başlayıb. Bu müddətdə yağlı boya və akril texnikası ilə 70 əsər yaradıb. Azərbaycan mənzərələri, portretlər, dəniz təsvirləri onun ən sevimli mövzularıdır.

Bildirək ki, sərgidə Boris Şetinkinin müxtəlif mövzularda çəkdiyi 30-a yaxın əsəri nümayiş etdirilir. Onların içərisində “Mariya Şarapova”, “Tbilisi”, “Nağıl”, “Peterburq”, “Messi”, “Müslüm Maqomayev”, “Xəzər”, “Payız”, “Xanəgah kəndində çay”, “Sakitlik”, “Dağ yolu”, “Afurcada çay”, “İlandağ” tabloları xüsusilə seçilir.

S.Qaliboğlu

Mədəniyyət.- 2017.- 3 mart.- S.16.