Bakıda növbəti beynəlxalq kitab bayramı başlayır

Sentyabrın 28-dən 30-dək Mədəniyyət və Turizm Nazirliyinin təşkilatçılığı ilə V Bakı Beynəlxalq Kitab Sərgi-Yarmarkası keçiriləcək.

Bakı İdman Sarayında (keçmiş Əl Oyunları İdman Sarayı) təşkil olunan sərgi-yarmarkada iştirakla bağlı 100-dək yerli, 40-dan artıq xarici nəşriyyat, kitab evi və digər təşkilatlar qeydiyyatdan keçib. 2009-cu ildə əsası qoyulan Bakı Beynəlxalq Kitab Sərgi-Yarmarkası iki ildən bir təşkil olunur.

Sərgi-yarmarkanın rəsmi açılış mərasimi sentyabrın 28-də saat 11:00-da Bakı İdman Sarayında gerçəkləşəcək.

Tədbirin ilk günündə nazirliyin “Avtomat kitab köşkü” və “Azərbaycan kitabının dünyaya tanıdılması” layihələrinin təqdimatı, Rusiyanın “ASKİ” Naşirlər Assosiasiyası və MDB-yə üzv dövlətlərin nəşriyyatlarının toplantısı, habelə kitabxanaçılarımızın VI Ümumrespublika müşavirəsi keçiriləcək.

Sərgi-yarmarka çərçivəsində Xalq şairi Nəriman Həsənzadə, Xalq yazıçısı Çingiz Abdullayev, Yazıçılar Birliyinin katibi İlqar Fəhmi və digər müəlliflərin kitablarının imza günü təşkil olunacaq, kitab təqdimatları, çeşidli tədbirlər baş tutacaq.

Sərgi-yarmarkaya ziyarətçi qismində qatılmaq və tədbirlərdə iştirak sərbəstdir.

Mədəniyyət.- 2017.- 27 sentyabr.- S.2.