“Rusiyanın dahi
adları” arasında bir azərbaycanlı
Surqut şəhərinin aeroportu Fərman Salmanovun
adını daşıyacaq
Rusiya Federasiyasının Tümen vilayətinin Xantı-Mansiysk muxtar dairəsinin ən böyük beynəlxalq hava limanı – Surqut aeroportu əfsanəvi azərbaycanlı geoloq Fərman Salmanovun adını daşıyacaq. Bu, “Rusiyanın dahi adları” layihəsi çərçivəsində ölkənin 47 aeroportuna görkəmli şəxslərin adlarının verilməsinə dair keçirilən səsvermənin nəticələrinə əsasən məlum olub.
Rusiya Federasiyasının İctimai Palatası, Rusiyanın Dilçilik, Coğrafiya, Tarix və Hərbi-Tarix cəmiyyətlərinin birgə layihəsi üzrə reallaşan, “Bir səs – bir aeroport – bir ad” prinsipi üzrə keçirilən səsvermədə beş milyona yaxın rusiyalı iştirak edib.
Səsvermə ictimai kampaniyanın saytında, sosial şəbəkələrdə, həmçinin “qaynar xətt” və hava limanlarında, dəmir yolu vağzallarında könüllülər tərəfindən anket-sorğu vasitəsilə aparılıb. Nəticələr dekabrın 4-də elan olunub.
Xantı-Mansiysk muxtar dairəsinin
iki aeroportu – Nijnevartovsk və Surqut hava limanları həmyerlimizin adını
daşımaq uğrunda
yarışırdı. Səsvermənin nəticələrinə
görə, ən çox səsi Surqut aeroportu toplayıb. Nijnevartovsk hava limanı üçün ad seçimi
layihənin ikinci turunda davam edəcək.
Sibir neftini kəşf etmiş geoloq Fərman Salmanov 1931-ci il iyulun
28-də Şəmkir rayonunun
Morul kəndində anadan olub. O, Azərbaycan Dövlət Neft Akademiyasını bitirdikdən sonra Rusiyanın Xantı-Mansiysk
muxtar dairəsinin Surqut rayonunda neft-qaz yataqlarının kəşfiyyatı ilə
məşğul olub.
Burada ilk
dəfə Yuqra yatağını kəşf
edib.
Fərman
Salmanov xidmətlərinə
görə Sosialist Əməyi Qəhrəmanı
adına, “Lenin” və
“Qırmızı Əmək
Bayrağı” ordenlərinə,
Rusiya Federasiyasının
Əməkdar geoloqu və digər fəxri adlara layiq görülüb. O, Surqut şəhərinin və ABŞ-ın Texas ştatının fəxri
vətəndaşı idi.
2007-ci ildə vəfat edib.
“Rusiyanın dahi
adları” layihəsi üzrə səsvermənin
nəticələrinə əsasən,
Moskvanın Şeremetyevo
aeroportu böyük rus şairi Aleksandr Puşkinin, Domodedovo hava limanı isə məşhur alim Mixail Lomonosovun adını daşıyacaq. Digər
şəhərlərdəki bir sıra hava
limanları üzrə
də birinciliyi tanınmış ədəbiyyat,
mədəniyyət xadimləri
qazanıb: Krasnoyarsk – Dmitri Xvorostovski (bu şəhərdə doğulmuş
məşhur opera müğənnisi
2017-ci ildə vəfat
edib); Yujno-Saxalinsk –
Anton Çexov; Kazan – Qabdulla
Tukay (tatar şairi); Ufa – Mustay Kərim (başqırd şairi və yazıçısı); Maqadan
– Vladimir Vısotski; Mineralnıye
Vodı – Mixail
Lermontov; Anadır – Yuri Rıtxeu
(çukot yazıçısı).
Qeyd edək ki, dünyada
200-dən çox aeroport,
o cümlədən sərnişin
axını üzrə
“top 20”yə daxil olan ən böyük hava limanları (Paris – Şarl de Qoll, Nyu-York – Con Kennedi, Roma –
Leonardo da Vinçi, Dehli – İndira Qandi, İstanbul – Atatürk və s.) bir çoxu məşhur adamların adını daşıyır.
“Rusiyanın dahi
adları” səsverməsinin
nəticələri üzrə
hava limanlarına yeni adların verilməsi Prezident Vladimir
Putinin müvafiq qərarından sonra rəsmiləşəcək.
V.ORXAN
Mədəniyyət.- 2018.- 7
dekabr.- S.6.