Avrasiya Kitabxanalar Assambleyasının iclası keçirilib

Rusiya Dövlət Kitabxanasında Avrasiya Kitabxanalar Assambleyasının növbəti, 21-ci ümumi iclası olub. Dekabrın 5-də keçirilən tədbirdə ölkəmizi M.F.Axundzadə adına Azərbaycan Milli Kitabxanasının direktoru, Avrasiya Kitabxanalar Assambleyasının vitse-prezidenti, professor Kərim Tahirov təmsil edib.

İclasda assambleyanın cari fəaliyyəti, eləcə də yaxın iki il üçün irəli sürülən təşəbbüslər müzakirə olunub.

İclasın gündəliyinə əsasən, MDB-yə üzv dövlətlərin milli kitabxanalarının əsas istiqamətlər üzrə birgə fəaliyyət strategiyası, vahid biliklər mühitinin qurulması, fondların formalaşdırılması və inkişafı, kitab abidələri ilə iş, kütləvi kitabxanalar şəbəkəsinin inkişafı, professional tədris proqramlarının işlənməsi istiqamətləri üzrə müzakirələr aparılıb. Müzakirə olunmuş strategiya üzrə təkliflər formalaşdırılıb. Sonda 2019-2022-ci illər üçün Avrasiya Kitabxanalar Assambleyasının baş direktoru vəzifəsinə seçkilər keçirilib, XXII ümumi iclasın keçirilmə yeri və vaxtı müəyyənləşdirilib. 2019-cu ilin MDB-də “Kitab ili” elan edilməsi ilə bağlı fikir mübadiləsi aparılıb.

Həmçinin MDB-yə üzv ölkələrin kitabxanalararası abonement üzrə bölməsinin 9-cu yığıncağı keçirilib. Yığıncaqda səlahiyyətli nümayəndələrin siyahısı, 2019-cu il üçün bölmənin tədbirlər planı təsdiq olunmaqla hesabatına baxılıb.

Mədəniyyət.- 2018.- 7 dekabr.- S.3.