“İblis” Türkiyədə tamaşaya qoyulur

Azərbaycanın böyük şairi və dramaturqu Hüseyn Cavidin “İblis” əsəri yaxın aylarda İstanbulda teatrsevərlərə təqdim olunacaq.

Hüseyn Cavidin anadan olmasının 135, “İblis” əsərinin yazılmasının 100 illiyi şərəfinə İstanbul Böyükşəhər Bələdiyyəsi Şəhər Teatrlarında səhnələşdirilən tamaşanın məşqləri davam edir.

İstanbul Böyükşəhər Bələdiyyəsi Şəhər Teatrlarının direktor müavini, Əməkdar incəsənət xadimi Məlahət Abbasovanın quruluş verdiyi tamaşanın baş məsləhətçisi filologiya üzrə fəlsəfə doktoru Sona Vəliyeva, musiqi tərtibatçısı, Xalq artisti Aygün Səmədzadədir. Beynəlxalq Türk Mədəniyyəti və İrsi Fondu “İblis”in səhnələşdirilməsinə dəstək göstərir.

Əsərin mətnini müasir türk dilinə görkəmli dramaturq Hilmi Zəfər Şahin və Məlahət Abbasova uyğunlaşdırıblar. Türkiyənin tanınmış aktyorları Rıdvan Çələbi, Əmrə Narcı, Mazlum Kiper, İsgəndər Bağçılar, Çağatay Palabıyık və başqaları tamaşada rol alıblar.

Hüseyn Cavid yaradıcılığına qardaş Türkiyədə hər zaman böyük diqqət göstərildiyini qeyd edən Məlahət Abbasova bildirib ki, tamaşanın premyerası 2019-cu ilin birinci rübünə planlaşdırılıb.

Mədəniyyət.- 2018.- 12 dekabr.- S.5.