Dostun varsa, bağlanış da bayramdır...

Adətən belə deyirlər ki, teatr mövsümünün açılışı, hər hansı tamaşanın premyerası bayramdır. Bəs teatr mövsümünün bağlanış günü necə? Axı, artıq neçə ildir ki, paytaxtın bir neçə teatrında mövsümün başa çatması bayramsayağı qeyd olunur. Əslində bu işdə məntiq var. Yəni, hər həftə bir neçə dəfə teatrsevərlərə bayram ovqatı bəxş edən yaradıcı kollektivlər məzuniyyət öncəsi öz-özlərinə bayram keçirirlər.

İyulun 15-də A.Şaiq adına Azərbaycan Dövlət Kukla Teatrı 86-cı teatr mövsümünə yekun vurdu. Həmin gün paytaxtın teatr ictimaiyyətinin və mədəniyyət sahəsi üzrə media təmsilçilərinin toplaşdığı tədbirdə kuklaçılarla eyni binanı paylaşan Dövlət Yuğ Teatrı da 29-cu teatr mövsümünü tamamladı.

* * *

Kukla teatrının kollektivi mövsümün son bazar günü üç seans tamaşa oynayandan sonra, Yuğ teatrının heyəti isə mövsümün son premyerasının nümayişindən əvvəl bir araya gəlib, hətta eyni səhnəni paylaşdılar. Əməkdar mədəniyyət işçisi, Kukla teatrının direktoru (həm də əvəzçiliklə “Yuğ”un direktoru vəzifəsini icra edən) Rəşad Əhmədzadə hər iki kollektivin mövsüm ərzindəki uğurlarından, festivallardakı çıxışlarından danışdı, fəxri ada layiq görülmüş aktyorları bir daha təbrik etdi.

Qeyd etdi ki, teatrların bu uğurlarında mədəniyyətdən, daha dəqiq desək, teatrdan yazan jurnalistlərin də əməyi az deyil. Çünki teatrın yaradıcılıq həyatında baş verən bütün yenilikləri məhz onlar geniş oxucu-tamaşaçı kütləsinə çatdırır, cəmiyyətdə teatr tamaşalarına maraq yaradırlar.

Hər iki teatrın baş rejissorları – “Yuğ”dan Əməkdar incəsənət xadimi Mehriban Ələkbərzadə və Kukla teatrından Prezident mükafatçşısı Qurban Məsimov uğurlu tamaşalarla yadda qalmış mövsümün başa çatması münasibətilə kollektiv üzvlərini təbrik etdilər, hər kəsə növbəti mövsümdə daha səmərəli çalışmağı və daha böyük uğurlara imza atmağı arzuladılar.

Sonra Rəşad Əhmədzadə hər iki teatrın fəaliyyətini davamlı olaraq işıqlandırmış jurnalistlərə “Teatrın dostu” xatirə mükafatını təqdim etdi. Zərəngiz Qayalı (AZƏRTAC), Bəhruz Niftəliyev (AzTV, “Mədəniyyət” kanalı), Gülcahan Mirməmməd (“Mədəniyyət” qəzeti), Xalidə Gəray (“Yeni Müsavat” qəzeti) və Nicat Orucov (ATV kanalı) A.Şaiq adına Azərbaycan Dövlət Kukla Teatrının “dostu” adına layiq görüldülər. Yuğ teatrı isə teatro.az elektron portalının baş redaktoru Vidadi Qafarovu, ARB “Aranfilm” Yaradıcılıq Mərkəzinin bədii rəhbəri Tahir Əliyevi, kulis.az saytının əməkdaşı Samirə Əşrəfi və “Ədalət qəzeti” portalının əməkdaşı Sultan Mahmudovu mükafatlandırdı.

“Teatrın dostu” olaraq alqışlanmaq, hər dəfə salonda əyləşib seyr etdiyin səhnəyə qalxaraq ürək sözünü söyləmək nə qədər xoş olsa da, il ərzində fərqlənmiş teatr əməkdaşlarının da kimliyini bilmək maraqlı idi...

Beləliklə, kuklaçılardan Elmira Hüseynova “Sevilən aktrisa” və Cavid İbrahimov “Ən zəhmətkeş aktyor” kimi, aktyor Rauf Babayev, baş rəssam İqbal Əliyev və Anar Məmmədov isə il ərzindəki səmərəli fəaliyyətə görə teatr rəhbərliyinin diqqətindən kənarda qalmadı.

“Yuğ”çulardan isə 60 yaşını qeyd edən Əməkdar artist Vidadi Həsənov “Ən zəhmətkeş aktyor”, Oktay Mehdiyev “Sevilən aktyor”, Natəvan Qeybullazadə (Qeybani) “Sevilən aktrisa” nominasiyaları üzrə mükafatlandırıldılar. Rejissor Günay Səttar, rejissor assistenti Sabir Məmmədov, aktyor Elgün Həmidov, ədəbi hissə müdiri Elçin Cəfərov, baş mühasib Samirə Tağıyeva, səs rejissoru Nurə Hüseynova, işıqçılar Samir Mehdiyev və Yusif Adıgözəlovun çalışmaları “Səmərəli yaradıcılıq fəaliyyətinə görə” fərqləndirildi.

* * *

Beləcə, eyni gündə mövsümün sonuncu yeni tamaşasını pərəstişkarlarına təqdim edən hər iki kollektiv sentyabr ayınadək öz tamaşaçıları ilə sağollaşdı.

Xatırladaq ki, Azərbaycan Dövlət Kukla Teatrı 86-cı mövsümü M.Seyidzadənin “Cırtdan” mənzum nağıl-pyesinin Azərbaycan dilində yeni versiyada bərpa olunmuş, rus bölməsində isə bu klassik nağıl əsasında yeni səhnə yozumu ilə “Üç cəsur” adlı tam yeni quruluşda tamaşaları ilə bitirdi.

Dövlət Yuğ Teatrı isə 29-cu mövsümü böyük rus yazıçı-dramaturqu A.P.Çexovun əsəri əsasında Günay Səttarın quruluş verdiyi “Təklif. Elçilik” tamaşasının nümayişi ilə başa çatdırdı.

Gülcahan

Mədəniyyət.- 2018.- 18 iyul.- S. 11.