Şəhid qəhrəmanın xatirəsi yad edilib

İyunun 5-də Azərbaycan Hərb Tarixi Muzeyində “Azərbaycan bayrağı” ordenli kəşfiyyatçı Ülfət Kərimovun anım gününə həsr olunan “El qəhrəmanları” adlı tədbir keçirilib.

Muzeyin rəisi, ehtiyatda olan polkovnik Əzizağa Qənizadə şəhid Ülfət Kərimovun keçdiyi döyüş yolundan danışıb. Bildirib ki, Kəlbəcərdə doğulub boya-başa çatan Ülfət Kərimov erməni qəsbkarlarına qarşı döyüşlərdə düşmənin xeyli canlı qüvvəsini, hərbi texnikasını məhv edib. Kəşfiyyatçı kimi xidmət edən Ülfət Kərimov 1993-cü il martın 27-də Kəlbəcər rayonunun Ağdaban kəndi istiqamətində əhalinin kəndi tərk edə bilməsi üçün ermənilərlə qeyri-bərabər döyüşə girib. Əhalinin kəndi sağ-salamat tərk etməsinə nail olsa da, özü Aşıq Şəmşirin məzarı yaxınlığında düşmən tankını məhv edərkən şəhid olub. Ü.Kərimov 1993-cü il sentyabrın 13-də ölümündən sonra “Azərbaycan Bayrağı” ordeni ilə təltif edilib.

Anım mərasimində çıxış edənlər qəhrəmanın döyüş yolundan, Vətən uğrunda fədakarlığından söhbət açıblar. Qeyd edilib ki, Ülfət Kərimov kimi qəhrəmanlarımızın həyat yolu gənclərimiz üçün örnəkdir. Çünki onlar xalqımızın azadlığı, müstəqilliyi, torpaqlarımızın müdafiəsi üçün canlarını fəda ediblər.

Tədbirdə qəhrəman şəhidə həsr olunmuş film nümayiş olunub, sərgi təşkil edilib. Məktəblilər vətənpərvərlik mövzusunda şeirlər oxuyublar.

Qəhrəmanın ailə üzvləri adından qardaşı Zöhrab Kərimov çıxış edərək, tədbirin təşkilatçılarına və iştirakçılarına təşəkkürünü bildirib.

Mədəniyyət.- 2018.- 8 iyun.- S.7.