“Dastan gecələri”ndə “Aşıq Alının Türkiyə səfəri”

Oktyabrın 31-də Beynəlxalq Muğam Mərkəzində “Dastan gecələri” layihəsi çərçivəsində “Aşıq Alının Türkiyə səfəri” dastanı təqdim olunub. Layihə Beynəlxalq Muğam Mərkəzinin və Azərbaycan Milli Elmlər Akademiyası (AMEA) Folklor İnstitutunun birgə təşkilatçılığı ilə reallaşır.

Folklor İnstitutunun şöbə müdiri, Əməkdar mədəniyyət işçisi Elxan Məmmədli çıxış edərək aşıq sənətinin təbliği baxımından layihənin əhəmiyyətindən danışıb.

O, aşıq sənətinin Azərbaycan xalq yaradıcılığının qədim tarixi köklərə malik özünəməxsus hadisəsi olduğunu, bu sənətin müxtəlif mərhələlərdən keçərək xalqımızın bir çox qeyri-maddi mədəni dəyərlərini özündə cəmləşdirdiyini qeyd edib.

“Aşıq Alının Türkiyə səfəri” dastanı barədə məlumat verən E.Məmmədli deyib: “Dastan sadə və ənənəvi bir süjet üzərində qurulub. İstədiyi qızı almaq üçün çətinlik qarşısında qalan qəhrəman uzaq diyara yollanır, sınaqlardan sazının-sözünün qüdrəti ilə çıxır, nişanlısının toy günündə qayıdıb gəlir və muradına yetir”.

Dastanı tamaşaçılara aşıqlar Bəhmən Göyçəli və Firudin Göyçəli təqdim ediblər. Onları balabanda Əziz Göyçəli müşayiət edib.

Mədəniyyət.- 2018.- 2 noyabr.- S.3.