Mediada Azərbaycan dilinin qorunması

Dəyirmi masada müzakirə olunub

Sentyabrın 7-də Mətbuat Şurasının təşəbbüsü ilə “Mediada Azərbaycan dilinin qorunması: problemlər və perspektivlər” mövzusunda dəyirmi masa təşkil edilib.

Şuranın sədri, Milli Məclisin deputatı Əflatun Amaşov bildirib ki, tədbir Prezident yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə yardımı ilə gerçəkləşən layihə çərçivəsində reallaşır.

O, mövzunun aktuallığından bəhs edərək deyib ki, ötən illərlə müqayisədə bu sahədə irəliləyişlərin əldə olunmasına baxmayaraq, jurnalistikada ədəbi dilin işlədilməsi qaydaları ilə bağlı problemlər yaşanmaqdadır.

Şuranın ədəbi dilin qorunması ilə bağlı monitorinq qrupunun rəhbəri, Azərbaycan Dövlət Pedaqoji Universitetinin müəllimi, “Xalq qəzeti”nin əməkdaşı İlham Abbasov 15 iyun – 15 noyabr tarixlərini əhatə edən monitorinqin ilkin nəticələri barədə məlumat verib: “Müşahidələrimiz onu deməyə əsas verir ki, ötən illərdən fərqli olaraq ümumən mediada ana dilimizin işlədilməsi sahəsində müsbət tendensiyalar nəzərə çarpmaqdadır”.

Mediamızda ana dilimizdən istifadə sahəsində kifayət qədər pozuntu faktlarının olduğunu vurğulayan MŞ İdarə heyətinin üzvü, “İki sahil” qəzetinin baş redaktoru Vüqar Rəhimzadə bildirib ki, hər bir media orqanı yol verdiyi dil xətalarını səmimi qarşılamalı, fəaliyyətində dönüş etməyi bacarmalıdır.

Dəyirmi masada çıxış edənlər bildiriblər ki, jurnalistikanın söz sənəti kimi ədəbi dilə riayət etməsi örnək mahiyyət daşıyır. Onlar digər sahələrdə də ana dilindən istifadədə ciddi nöqsanların mövcudluğuna diqqət çəkiblər və bununla əlaqədar olaraq maarifləndirmə işləri ilə yanaşı, hüquqi mexanizmlərin tətbiqinin əhəmiyyətini vurğulayıblar. Qeyd olunub ki, ana dilindən istifadə sahəsində pozuntuları doğuran daha bir cəhət jurnalistikada ixtisaslaşmanın zəifliyidir.

Mədəniyyət.- 2018.- 12 sentyabr.- S.15.