Avropa Tarixi Termal Şəhərlər Assosiasiyası İcraiyyə Şurasının iclası

Qurumun may ayında Qalaaltıda keçiriləcək Baş Assambleya toplantısına hazırlıq müzakirə olunub

Yanvarın 17-dən 19-dək Fransanın paytaxtı Parisdə Avropa Tarixi Termal Şəhərlər Assosiasiyası (EHTTA) İcraiyyə Şurasının iclası keçirilib. İclasda Mədəniyyət və Turizm Nazirliyinin İnformasiya və ictimaiyyətlə əlaqələr şöbəsinin əməkdaşı - assosiasiya üzrə layihə koordinatoru Günel Aslanova iştirak edib.

Tədbirdə çıxış edən Avropa Tarixi Termal Şəhərlər Assosiasiyasının prezidenti Guiseppe Bellandi bildirib ki, son illər statistik təhlillərə nəzər saldıqda Avropa sağlamlıq turizmi məkanlarının, yerləşdirmə obyektlərinin sayının artması təqdirəlayiqdir. Onun sözlərinə görə, bu sahənin inkişafı EHTTA tərəfindən əhəmiyyətli layihələr həyata keçirilməsinə geniş imkanlar açır.

Tədbir çərçivəsində EHTTA-nın rəhbəri G.Bellandi ilə Mədəniyyət və Turizm Nazirliyinin əməkdaşı Günel Aslanova arasında görüş keçirilib və may ayında qurumun Qalaaltıda keçiriləcək illik toplantısı haqqında ətraflı fikir mübadiləsi aparılıb. Eyni zamanda tədbirin təşkilatçılığı ilə bağlı həm assosiasiya, həm də nazirlik tərəfindən görüləcək işlər barədə detallar müzakirə olunub.

Görüş zamanı yaxın gələcəkdə Azərbaycanın digər termal imkanları geniş olan və daha çox inkişaf etmiş sağlamlıq turizmi regionlarının da assosiasiyaya üzvlüyü məsələsi qaldırılıb.

Xatırladırıq ki, 2016-cı ildən etibarən Mədəniyyət və Turizm Nazirliyinin dəstəyi ilə Qalaaltı kurortu (Şabran rayonu) Avropa Tarixi Termal Şəhərlər Assosiasiyasının “Termal şəhərlər” beynəlxalq mədəni marşrutuna qoşulub. Üzvlük çərçivəsində 2018-ci ilin mayında EHTTA-nın növbəti Baş Assambleya toplantısının Qalaaltıda keçirilməsi qərara alınıb.

Mədəniyyət.- 2017.- 24 yanvar.- S.9.