Mətnşünaslıq elmini öyrənmək üçün yeni mənbə

AMEA-nın Məhəmməd Füzuli adına Əlyazmalar İnstitutunun Ərəbdilli əlyazmaların tədqiqi şöbəsinin müdiri, filologiya üzrə elmlər doktoru Kamandar Şəriflinin “Əsərləri”nin IV cildi nəşr olunub. Cildə üç kitab daxildir. Nəşrin elmi redaktoru institutun direktoru, akademik Teymur Kərimlidir.

Birinci kitabda XIV əsr türk şairi Ümmi İsanın “Mehri və Vəfa” adlı məsnəvisi haqqında K.Şəriflinin araşdırması, məsnəvinin Əlyazmalar İnstitutunda saxlanılan iki əlyazma nüsxəsinin orijinal mətni, eləcə də latın əlifbasına transliterasiya edilən mətni təqdim olunur.

İkinci kitabda görkəmli Azərbaycan şairi və tarixçisi Mir Möhsün Nəvvabın ermənilərin Qarabağda, Azərbaycanın digər bölgələrində törətdikləri qırğınlardan bəhs edən “1905-1906-cı illərdə erməni-müsəlman davası” əsəri yer alır.

Üçüncü kitaba isə XIII əsrdə yaşamış ensiklopedik biliyə malik Nəsirəddin Tusinin “Adabül-mütəəllimin” (“Tələbəlik mədəniyyəti”) risaləsinin Azərbaycan dilinə tərcümə olunan mətni və əsər haqqında məlumat daxildir. Əsəri ərəb dilindən tərcümə edən professor Kamandar Şəriflidir.

Mədəniyyət.- 2019.- 5 iyul. S. 7.