“Mən öləndən sonra xoşbəxt idim”

Xalq artisti Həmidə Ömərovanın yenicə işıq üzü görmüş “Mən öləndən sonra xoşbəxt idim” kitabına yazdığı ön söz məni hələ 30 il bundan öncə ağlatmışdı. Həmidə xanım göz yaşları içində atasının ona vəsiyyət olaraq qoyub getdiyi gündəliyini oxuyurdu mənə həmən o gün.

Sonralar sənətkarımızın mətbuatda vaxtaşırı çıxan hekayələrini oxuyanda, onu gözəl aktrisa olmaqla yanaşı, istedadlı yazıçı kimi də qəbul edib qələminin, sözünün sehrinə heyranlığımı bölüşürdüm.

Çox vaxt bu hekayələri mətbuat səhifələrində görəndə düşünürdüm ki, niyə görə Həmidə Ömərovanı yazıçı kimi hələ də geniş oxucu kütləsi tanımır. Ona görə də o, yenicə çapdan çıxan kitabını mənə verəndə Həmidə Ömərovanın əsərlərini oxumaq imkanı qazanan oxucuların əvəzinə də sevindim. Onu da qeyd edim ki, bu kitabı əlimə almağım artıq neçə gün idi ki, məni məşğul edən bir halın formulunu axtardığım məqamla üst-üstə düşdü və kitabın adı – “Mən öləndən sonra xoşbəxt idim” məni diksindirdi. Həyat formulunu əks etdirir bu iddia. “Mən öləndən sonra xoşbəxt idim” bizi “Ol” deyib yaradan Tanrından gələn vəhy kimi səslənir, çünki öləndən sonra xoşbəxt olmağın mənası dərindir və ona görə də bu iddianı həm də Həmidə xanımın bir sənətkar olaraq vəhy halı kimi dəyərləndirdim...

Avtobioqrafik hekayələrdən ibarət olan kitab həm də katarsis mahiyyətlidir. Həmidə Ömərova cəmiyyətin yaralarını sağaltmaq missiyası olan bir şəxsiyyət kimi yazıb bu əsərlərini.

Hekayələrdən əlavə kitaba “Mən öləndən sonra xoşbəxt idim” adlı bir ssenari də daxil edilib ki, bu ssenarini ekranda görmək arzumun da ürəyimdə qalmamasını istəyirəm.

Müəllifin kitaba yazdığı “Son söz əvəzi” hissəsindəki müraciəti də sənətkar səmimiyyətini və oxucusuna məhəbbətini əks etdirir: “Mən bu kitabda 15-20 ildə yazdığım hekayələrimin çox az bir hissəsini və kinossenarimin birinci hissəsini nəşr etdirirəm… Bilmirəm… Bəlkə bu mənim ilk və son bədii kitabım olacaq… Amma əminəm ki, iki oxucum mütləq məndən razı qalacaqdır...”

P.S. Burda adıçəkilən iki nəfər millət vəkili Aydın Mirzəzadə və yazıçı Əli Əmirlidir. Məhz onların “Həmidə, kitab, kitab çıxar!” deyə aramsız təkidiylə işıq üzü görən bu balaca kitabın içində Həmidə Ömərovamızın xalqına böyük məhəbbəti aşkar göründüyü üçün bu təkid vacib imiş.

Sədaqət KAMAL

Mədəniyyət.- 2019.- 24 iyul. S. 6.