Sami Yusufa Azərbaycan Prezidentinin fəxri diplomu təqdim edilib

Azərbaycan Respublikasının Birinci vitse-prezidenti Mehriban Əliyeva oktyabrın 1-də Azərbaycan əsilli dünyaca məşhur müğənni və bəstəkar Sami Yusufla görüşüb.

Mehriban Əliyeva Sami Yusufun 2-ci Nəsimi – şeir, incəsənət və mənəviyyat Festivalında iştirakını yüksək dəyərləndirib. Birinci vitse-prezident müğənninin bu ilin iyununda Bakıda UNESCO-nun Dünya İrs Komitəsinin 43-cü sessiyası çərçivəsində keçirilən konsertdəki çıxışını da xatırladaraq bu konsertin ən yüksək səviyyədə təşkil edildiyini və Azərbaycan ilə UNESCO arasındakı əlaqələrə töhfə olduğunu vurğulayıb. Bildirib ki, Azərbaycan Prezidentinin sərəncamına əsasən, Dünya İrs Komitəsinin 43-cü sessiyasının Bakıda təşkili və keçirilməsində fəal iştirak etmiş şəxslər “Azərbaycan Respublikası Prezidentinin fəxri diplomu” ilə təltif ediliblər. Onların sırasında Sami Yusuf da var.

Birinci vitse-prezident fəxri diplomu müğənniyə təqdim edib.

Mehriban Əliyeva sənətçiyə gələcək yaradıcılığında uğurlar arzulayıb. Sami Yusuf yüksək mükafata görə minnətdarlığını bildirib.

Mədəniyyət.- 2019.- 4 oktyabr.- S.2.