İCESCO-nun baş direktoru ilə onlayn görüş

Mədəniyyət naziri Əbülfəs Qarayev və İCESCO-nun baş direktoru Salim Al-Malik arasında aprelin 24-də onlayn görüş keçirilib. Görüşdə İCESCO ilə Azərbaycan arasındakı mövcud əlaqələr və əməkdaşlığın perspektivləri barədə fikir mübadiləsi aparılıb.

Salim Al-Malik COVİD-19 pandemiyası ilə mübarizə dövründə təşkilatın fəaliyyəti, o cümlədən bu mövzuda elan olunan müsabiqələr barədə məlumat verib. Həmçinin “İCESCO rəqəmsal evi” təşəbbüsü və bu təşəbbüs çərçivəsində həyata keçirilən “Distant mədəniyyət” proqramı barədə söhbət açılıb.

Baş direktor hazırda qurumun pandemiyaya qarşı mübarizə məqsədilə beynəlxalq koalisiyanın yaradılması təşəbbüsü ilə çıxış etdiyini bildirib. O, Azərbaycan tərəfindən də bu təşəbbüsə dəstək göstəriləcəyinə ümidvar olduğunu deyib.

Əbülfəs Qarayev təşkilatın təşəbbüslərini alqışladığını, Azərbaycan Respublikası Mədəniyyət Nazirliyi tərəfindən də mövcud vəziyyətlə əlaqədar bir sıra layihələrin həyata keçirildiyini, həmçinin İCESCO-nun proqram və layihələrinin ölkəmizdə geniş şəkildə təqdim olunduğunu diqqətə çatdırıb. Nazir təşkilatın beynəlxalq koalisiyanın yaradılması ilə bağlı təşəbbüsünün rəsmi şəkildə təqdim edildikdən sonra Azərbaycan tərəfindən bu məsələyə baxıla biləcəyini qeyd edib.

Görüşdə həmçinin “Bakı Prosesi”nin əhəmiyyəti və perspektivləri müzakirə edilib və gələcəkdə İCESCO-ya üzv ölkələr arasında onlayn platformaların genişləndirilməsi barədə razılığa gəlinib.

Mədəniyyət.- 2020.- 29 aprel.- S.3.