Ordubadinin Azərbaycan tarixi haqqında məqalələri nəşr edilib

XX əsr Azərbaycan ədəbiyyatının görkəmli nümayəndəsi, ədəbiyyatımızda tarixi roman janrının banisi Məmməd Səid Ordubadinin AMEA Məhəmməd Füzuli adına Əlyazmalar İnstitutundakı şəxsi arxivində saxlanılan Azərbaycan tarixinə dair məqalələri kitab şəklində nəşr olunub.

Əlyazmalar İnstitutundan bildirilib ki, kitabda Ordubadinin avtoqraf nüsxələri əsasında Azərbaycan və İran tarixi, məşhur şəxsiyyətlər və dövlət adamları haqqında yazdığı məqalələr toplanıb. Burada ədibin qədim Midiya dövləti, Təbriz şəhəri, İran inqilabı, habelə Qara Məlik, Qaradağlı Camal, Səttar xan, Molla Pənah Vaqif, Şəmsəddin Təbrizi kimi tarixi şəxsiyyətlər haqqında dəyərli araşdırmaları yer alıb.

Məqalələri ərəb əlifbasından transfoneliterasiya edib nəşrə hazırlayan, tərtib edən və ön sözün müəllifi institutun şöbə müdiri, filologiya üzrə elmlər doktoru Nailə Səmədovadır. Nəşrin elmi redaktoru tarix üzrə elmlər doktoru, professor Şahin Fazil, rəyçiləri filologiya üzrə elmlər doktoru, professor Kamandar Şərifli və tarix üzrə elmlər doktoru Məryəm Seyidbəylidir.

Mədəniyyət.- 2020.- 11 mart.- S.7.