İyirmi səkkiz ildən sonra Şuşada ilk azan oxunub

Azərbaycanın tarixi şəhəri, Qarabağın incisi Şuşada 28 ildən sonra ilk dəfə azan oxunub. Bu barədə video sosial şəbəkələrdə yayılıb.

28 ildən sonra bu qədim Azərbaycan şəhərində azanı oxuyan ilk şəxs Azərbaycan əsgəridir. Rəşadətli Ordumuz tərəfindən azad olunan Şuşada üçrəngli şanlı Azərbaycan bayrağı dalğalanır.

Xatırladaq ki, Prezident İlham Əliyev noyabrın 8-də Şuşanın işğaldan azad edilməsi ilə bağlı xalqa müraciətində bildirmişdi ki, bu şəhərin Azərbaycan tarixində xüsusi yeri var: “Bu, bizim qədim, tarixi şəhərimizdir. Əsrlər boyu azərbaycanlılar Şuşada yaşayıb, qurub, yaradıb. Şuşa nəinki Azərbaycanın, bütün Qafqazın incisidir. Ancaq mənfur düşmən Şuşanı işğal altında saxlamaqla bizim mədəni irsimizə böyük zərbə vurdu, bizim tarixi abidələrimizi dağıtdı, bizim məscidlərimizi dağıtdı, təhqir etdi. Biz indi Şuşaya qayıtmışıq. Bütün tarixi abidələrimizi bərpa edəcəyik, bütün məscidləri bərpa edəcəyik, 28 ildən sonra Şuşada yenə də azan səsi eşidiləcək”.

Mədəniyyət.- 2020.- 13 noyabr.- S.4.