Zəngilanın görməli yerləri ilə bağlı tanıtım videoçarxı hazırlanıb

Dövlət Turizm Agentliyi tərəfindən işğaldan azad edilmiş Zəngilanın gəzməli-görməli yerləri haqqında tanıtım videoçarxı hazırlanıb.

“Azad edilmiş torpaqlarımızın geniş turizm potensialı var. Biz artıq bu potensialı qiymətləndiririk. Bu gün isə Ali Baş Komandanın rəhbərliyi ilə qəhrəman Ordumuzun azad etdiyi Zəngilanın gəzməli-görməli yerlərini təqdim edirik”, - deyə Dövlət Turizm Agentliyinin sədri Fuad Nağıyev rəsmi “Tvitter” səhifəsində paylaşımında bildirib.

Çarxda Zəngilanın gəzməli-görməli yerləri, o cümlədən XIV əsrdə inşa edilmiş, səkkizguşəli prizmadan ibarət Məmmədbəyli türbəsi, XII əsrə aid edilən qədim Şərifan şəhərinin qalıqları, Ağbiz kəndində yerləşən eyniadlı tarixi bulaq, xalq qəhrəmanı Koroğlunun adı ilə hallandırılan ağ rəngli daş, rayonun Babalı kəndində yerləşən alban kilsəsi və 1974-cü ildə 107 hektar ərazidə əsasən nadir təbii çinar meşəliyini qorumaq məqsədilə yaradılmış Bəsitçay qoruğu haqqında məlumatlar təqdim olunur.

Agentlik tərəfindən bundan əvvəl erməni işğalından azad edilmiş Qubadlının gəzməli-görməli yerləri haqqında videoçarx təqdim olunmuşdu. Layihə çərçivəsində digər azad edilmiş torpaqlarımızın turizm potensialını əks etdirən bu növ videoçarxların hazırlanması nəzərdə tutulub.

Mədəniyyət.- 2020.- 20 noyabr.- S.2.