Milli Xalça Muzeyinin onlayn layihələri

Rəşadətli Azərbaycan Ordusunun işğaldan azad etdiyi ərazilərimizdə üçrəngli bayrağımızın dalğalandığı bu günlərdə Azərbaycan Milli Xalça Muzeyi də Qarabağın mədəni irsini dünyada tanıtmaq üçün işlər həyata keçirir.

Kütləvi informasiya vasitələrində Milli Xalça Muzeyində qorunan Qarabağa aid xalçalar və digər eksponatlar barədə məlumatlar verilir, teleproqramlarda bu mövzuda çıxışlar edilir, muzeyin sosial şəbəkə hesablarında Qarabağın dekorativ-tətbiqi sənət irsi ilə bağlı məlumatlar yerləşdirilir.

Muzeydən bildirilib ki, müvafiq informasiyalar Azərbaycan, ingilis və rus dillərində, həftə ərzində müxtəlif rubrikalar üzrə təqdim olunur. Bazar ertəsi “Qarabağın xalça salnaməsi” rubrikası üzrə məlumatlar verilir. Çərşənbə axşamı “Könlüm keçir Qarabağdan...” rubrikasında Qarabağın dilbər guşələrindən mənzərələr və etnoqrafiyasına aid arxiv şəkilləri nümayiş etdirilir. Növbəti günü geyim, zərgərlik və s. nümunələr “Qarabağ – sənətkarlar diyarı” rubrikasında təqdim olunur. Cümə axşamı “Çeşnilərdə əbədiləşən Qarabağ” rubrikasında Azərbaycan xalçaçılıq sənətini dünyaya tanıdan Xalq rəssamı Lətif Kərimovun müəllifi olduğu eskizlər paylaşılır. Qarabağın qabaqcıl şəxsiyyətləri haqqında maraqlı məlumatlar cümə günləri “İncitək parlayanlar” rubrikasında təqdim edilir.

Mədəniyyət .-2020.- 30 oktyabr.- S.4.