Hər kəsə qabiliyyətinə görə...

Yaradıcı ixtisaslara müraciət etmək, bu sahə ilə gələcək həyatını bağlamaq hər bir gəncin estetik duyğularından, onun sənətə olan məhəbbətindən xəbər verir. Son illərdə ölkəmizdə yaradıcı ixtisaslara maraq göstərən gənclərin sayı artmaqdadır. Vokal, instrumental ifaçılıq, rəssamlıq və digər sahələrdə qazanılan nailiyyətlər gənc nəsli bu istiqamətə yönəldir, yeni axtarışlara, sənətə yeni nəfəsin gəlməsinə şərait yaradır.

2020/2021-ci tədris ilində ali təhsil müəssisələrinin xüsusi qabiliyyət tələb edən ixtisaslarına (XQTİ) qəbul imtahanları (V ixtisas qrupu) davam edir. Dövlət İmtahan Mərkəzindən (DİM) verilən məlumata görə, 27 avqustda başlanan qabiliyyət imtahanları sentyabrın 18-də başa çatacaq. Cari ildə 11 489 abituriyent və 2597 subbakalavr öz elektron ərizəsində yalnız V ixtisas qrupunu seçib. Bundan əlavə, 46 280 abituriyent I-IV qruplarla yanaşı, V qrupu da elektron ərizələrində qeyd edib.

XQTİ-lərə qəbul üçün qabiliyyət imtahanları 4 istiqamət üzrə keçirilir: təsviri sənət; musiqi sənəti; memarlıq; teatr, kino və xoreoqrafiya sənəti.

İmtahanların keçirilməsi və ümumilikdə bədii sənətə maraqla bağlı suallarımızı Bakı Xoreoqrafiya Akademiyasının şöbə müdiri Əbülfəz Babazadə cavablandırdı. Şöbə müdiri bildirdi ki, 2020/2021-ci tədris ilində abituriyentlərin Bakı Xoreoqrafiya Akademiyasında ali təhsil pilləsinin bakalavriat səviyyəsi üzrə xoreoqrafiya sənəti (sahələr üzrə), instrumental ifaçılıq (fortepiano, tar, nağara, qarmon, kamança) və sənətşünaslıq (sahələr üzrə) ixtisaslarına qəbul olunmaq imkanı var: “Müşahidə və təhlillərə görə, bu il xoreoqrafiya sənəti ixtisasına ötən illərlə müqayisədə daha böyük maraq var. Bu da daha çox son illər xoreoqrafiya sənəti və xoreoqrafiya təhsili sahəsində baş verən canlanma və geniş islahatların aparılması sayəsində mümkün olub. Bu ixtisasa xüsusi maraq daha çox respublikanın şəhər və rayonlarında fəaliyyət göstərən bədii özfəaliyyət dərnəklərinin əməkdaşları və müəllimləri tərəfindən göstərilir. Magistratura və doktorantura səviyyələri üzrə xoreoqrafiya sahəsini əhatə edən ixtisaslara da maraq böyükdür. Bu da xoreoqrafiya sənəti üzrə fundamental elmi tədqiqat işlərinin aparılmasına olan zərurətdən irəli gəlir”.

Azərbaycan Milli Konservatoriyasının məsul katibi Səbuhi Əliyev, əvvəlki illərdə olduğu kimi, builki qəbul imtahanlarında da xanəndəlik və milli musiqi alətlərinə daha çox maraq göstərildiyini deyir: “Xanəndəlik ixtisasından əlavə, milli vokal sahəsinə üz tutanlar da az deyil. Milli vokal sahəsində bu baxımdan həm də böyük inkişaf yaşanır. Bir neçə il idi ki, bizdə Estrada sənəti fakültəsi fəaliyyət göstərirdi, indi isə Populyar musiqi və caz ifaçılığı fakültəsi adlanır. Bu fakültədə həm vokal üzrə, həm də alətlə birgə imtahan verirlər. Artıq həmin ixtisas üzrə də imtahanlarımız olub. Ancaq nəticələr barədə DİM hələ açıqlama verməyib”.

Azərbaycan Dövlət Mədəniyyət və İncəsənət Universitetinin professoru, Əməkdar artist Mirnazim Əsədullayev isə qəbul imtahanlarında milli alətlərə maraqdan söz açdı: “Builki imtahan mənə hədsiz zövq verdi. Ona görə ki, gözəl kamança ifaçıları var idi. Yaxşı bal toplayan abituriyentlər, 9 balla qiymətləndirilən gənclər az olmadı. Milli alətimiz olan balaban ifaçıları isə tamam başqa bir maraqla dinlənildi. İndiyə kimi imtahan günü balaban üzrə 4 müraciətə uzun illərdir ki, rast gəlmirdik. Hər bir ifaçı da özünəməxsus bacarıq və istedad nümayiş etdirdi. Qanun aləti üzrə də istedadlı ifaçılar imtahana gəlmişdi. Proqramları da mürəkkəb və dəqiq seçilmişdi. Sonda müəllimlik ixtisası üzrə qarmon alətindən imtahan verənləri qeyd etmək istərdim. Qarmona çox axın var. Bacaran da gəlir, bacarmayan da. Amma bu dəfə müraciət edənlər sanki seçilmişlər idi. Şəffaf keçirilən imtahanlarda hər kəs layiq olduğu qiyməti alır. Deyilənə görə, tar aləti üzrə imtahanlar da çox uğurlu olub. Arzum budur, hər bir istedadlı uşaq öz adını DİM-in açıqladığı siyahıda görə bilsin. İstedadlı gənclər qəbul olunanda bizim üçün də işləmək asan olur. Həm də kadr seçimində yanılmırıq, istedadları gələcəyə daha da böyük şövqlə hazırlayırıq. Bütün tələbə adı qazanmaq istəyən gənclərə uğurlar arzulayıram”.

Sonda isə qeyd edək ki, dövlət tərəfindən gənc istedadlara göstərilən diqqət və qayğı, onlara Prezident təqaüdlərinin verilməsi, Heydər Əliyev Fondunun gənclərə bütün istiqamətlərdə dəstəyi nəticəsində Azərbaycan gəncliyi böyük uğurlara imza atır. Gənclərin cəmiyyətdə rolunu artırmaq, onların bilik və bacarıqlarının üzə çıxarılması bu sahədə dövlət siyasətinin prioritet istiqamətlərindən biridir. Bütün sadaladıqlarımız, təbii ki, gənclərin ixtisas seçiminə də təsirsiz ötüşmür.

Lalə AZƏRİ

Mədəniyyət.- 2020.- 16 sentyabr.- S.5.