Xalq artisti Vaqif Əliyev dünyasını dəyişib

Xalq artisti, teatr və kino aktyoru Vaqif Əliyev avqustun 13-də, 81 yaşında vəfat edib.

Vaqif Məzahir oğlu Əliyev 1940-cı il iyulun 31-də Bakıda anadan olub. 1958-ci ildə Azərbaycan Dövlət Dram Teatrında əmək fəaliyyətinə başlayıb, kütləvi səhnələrdə çıxış edib. Sonra Azərbaycan Dövlət Teatr İnstitutunda ali təhsil alıb.

1968-ci ildə təyinatla yeni yaranan Sumqayıt Dövlət Dram Teatrına göndərilib. 32 il bu teatrda aktyor kimi çalışıb, yüzdən artıq tamaşada müxtəlif obrazlar yaradıb. 2000-ci ildən sənət fəaliyyətini Bakı Bələdiyyə Teatrında davam etdirib. Filmlərə (“Ağ atlı oğlan”, “Yük”, “Biz qayıdacağıq”) çəkilib.

Vaqif Əliyev 1990-cı ildə respublikanın “Əməkdar artisti”, 2002-ci ildə “Xalq artisti” fəxri adlarına layiq görülüb.

Allah rəhmət eləsin.

Mədəniyyət.- 2021.- 18 avqust.- S.5.