UNESCO-da milli mətbəximizin təamlarının dadına baxıblar

UNESCO yanında Frankofon – fransızdilli ölkələr Qrupunun təşkilatçılığı ilə Parisdə, qurumun mənzil -qərargahında tədbir keçirilib.

Frankofoniyanın 50 illiyinə həsr edilmiş tədbirdə 31 fransızdilli ölkə iştirak edib. Azərbaycanın UNESCO yanında Daimi Nümayəndəliyi tədbirə müşahidəçi qismində qatılıb.

Çıxış edənlər mədəniyyətlərin mübadiləsi baxımından tədbirin əhəmiyyətinə toxunublar.

Tədbirdə Azərbaycan guşəsi də diqqəti cəlb edib. Guşədə milli suvenirlərimiz, misdən hazırlanmış qablar, nar formasında şirniyyat qabları, Azərbaycanın UNESCO siyahısında yer alan qeyri-maddi mədəni irs nümunələri ilə bağlı broşürlər, “İRS” jurnalının nüsxələri nümayiş olunub. Milli mətbəximizin dadlı təamları – dolma və qutab stendimizin ziyarətçiləri tərəfindən yüksək qiymətləndirilib.

Mədəniyyət.- 2021.- 3 noyabr.- S.8.