Nizami Gəncəvi Vəqfinin bir yaşı tamam olur

Dahi Azərbaycan şairi və mütəfəkkiri Nizami Gəncəvinin tərənnüm etdiyi bəşəri dəyərləri, ölkəmizin tolerantlıq, qarşılıqlı anlaşma və mədəniyyətlərarası dialoq ənənələrini təbliğ etmək, şairin vəfatından sonra Gəncə-Qarabağ bölgəsində fəaliyyət göstərmiş “Şeyx Nizami Vəqfi”nin mənəvi varisi olaraq bu irsi yaşatmaq məqsədilə yaradılan Nizami Gəncəvi Vəqfinin (NGV) bir yaşı tamam olur.

Vəqf “Nizami Gəncəvi İli” çərçivəsində 2021-ci ilin 24-26 noyabr tarixlərində Bakıda Mədəniyyət Nazirliyinin təşkilatçılığı ilə keçirilən “Nizami Gəncəvi: Mədəniyyətlər arasında körpü” mövzulu Nizami Gəncəvi Beynəlxalq Forumunun iştirakçıları tərəfindən irəli sürülən təklif və qəbul olunan kommünikenin müvafiq müddəaları əsas tutularaq ötən ilin 30 dekabrında təsis edilib.

Vəqfin məqsədi həmçinin Azərbaycanın qədim tarixini, zəngin mədəniyyətini, ədəbiyyatını, xüsusilə Azərbaycanın qədim şəhəri Gəncəni beynəlxalq auditoriyada geniş şəkildə tanıtmaq, Nizami Gəncəvinin ədəbi irsini tədqiq edən xarici və yerli alimlərin elmi mübadiləsini təşviq etmək, yeni tədqiqatların aparılmasına töhfə vermək, bu irsi tədqiq edən alimlər üçün Azərbaycan mərkəzli beynəlxalq əməkdaşlıq platforması yaratmaqdır.

NGV-nin fəaliyyətinin əsas istiqamətlərindən biri Nizaminin ədəbi irsinin beynəlxalq səviyyədə təbliğidir. Vəqf bu məqsədlə Atatürk Universitetinin (Türkiyə) professoru Nimet Yıldırım tərəfindən şairin “Xəmsə”sindən “İskəndərnamə” məsnəvisinin tam mətninin ilk dəfə olaraq fars dilindən türk dilinə tərcüməsinə dəstək göstərib. “Genceli Nizami. İskendername” kitabı Türkiyədə “Dergah Yayınları” tərəfindən çap olunub.

Gənc nəslin milli– mənəvi dəyərlərin daşıyıcısı olaraq yetişdirilməsi məqsədilə NGV həyata keçirdiyi layihələrdə gənclərin yaxından iştirakı üçün şərait yaradır. Gənclərin dünyagörüşünün formalaşmasına, sosial məsuliyyət hissinin və əməkdaşlıq vərdişlərinin aşılanmasına töhfə olaraq “Kəşf et, ünsiyyət qur, inkişaf et!” şüarı ilə “Gənclər konsepsiyası” hazırlanıb.

Vəqf, eyni zamanda regional və beynəlxalq səviyyəli dövlət və qeyri-hökumət təşkilatları ilə əməkdaşlıq çərçivəsində elmi və mədəni layihələrə dəstək vermək, nəticələri nəşrlər və digər vasitələrlə dünya ictimaiyyəti ilə bölüşərək fərqli mədəniyyətlər arasında körpü yaratmağı da qarşıya məqsəd qoyub. Bu məqsədlə Vəqfin Beynəlxalq Ekspertlər Şəbəkəsi (BEŞ) yaradılıb və bu elmi platformaya nüfuzlu elm adamları, ekspert və mütəxəssislərin üzvlüyə qəbulu prosesi davam edir.

Beynəlxalq əməkdaşlığa xüsusi önəm verən NGV bu ilin 1-4 sentyabr tarixlərində “Türk dünyasının mədəniyyət paytaxtı” Bursada 3-cü Beynəlxalq “Baramadan ipəyə” adlı festivala qatılaraq, Bakı Yunus Əmrə İnstitutunun dəstəyi və “Azəripək” MMC-nin tərəfdaşlığı ilə “Kəlağayı: Şəkidən Bursaya doğru uzanan ipək tellər” adlı milli stendi təşkil edib.

Mədəniyyət.- 2022.- 16 dekabr.- S.3.