“Aşıq divaniləri və müxəmməsləri”
antologiyası çapdan
çıxıb
Azərbaycan Aşıqlar Birliyinin 2022-ci ildə ilk nəşri – “Aşıq divaniləri və müxəmməsləri” adlı antologiya işıq üzü görüb.
Aşıqlar Birliyinin sədri, Əməkdar elm xadimi, professor Məhərrəm Qasımlı, filologiya elmləri doktoru, professor Mahmud Allahmanlı və filologiya üzrə fəlsəfə doktoru Altay Məmmədlinin tərtib etdikləri antologiya XVI əsrdən bu yana aşıqlarımızın yaratdıqları divani və müxəmməs şeir çeşidlərinin ən seçkin örnəklərini əhatə edir. Nəşrdə aşıq məclisinin açılışını, ilkin xeyir-duasını ortaya qoyan divanilərin, eləcə də qapanışını xoş bir ovqatla tamamlayan müxəmməslər tarixi-xronoloji ardıcıllıqla təqdim olunur.
Antologiyada
yüzdən çox sənətkarın divani və müxəmməsləri
yer alıb. Ustad məclislərində,
el yığıncaqlarında dillər əzbərinə
çevrilən bu nümunələr yüz illər boyu
ulularımızın könül həmdəmi
kimi onlara sənət
yoldaşlığı edib. Toplu saz-söz
ustadlarının bağrının başından qopan bu dərin poetik irsi gələcək
nəsillərə çatdırmaq məqsədilə
hazırlanıb.
Mədəniyyət.- 2022.- 2 fevral.- S.7.