Kitab sənayesi üzrə işbirliyi Tehranda müzakirə olunub

Xəbər verdiyimiz kimi, 11-21 may tarixində keçirilən 33-cü Tehran Beynəlxalq Kitab Sərgisində ölkəmiz də təmsil olunur.

Azərbaycan nümayəndə heyətinin rəhbəri, Mədəniyyət Nazirliyinin Kitab sənayesi şöbəsinin müdiri Akif Marifli Tehran Beynəlxalq Kitab Sərgisinin vitse-prezidenti, İran Kitab və Ədəbiyyat Evinin direktoru Ali Ramezani ilə görüşüb.

Görüşdə iki ölkə arasında kitab sənayesi və ədəbiyyat sahəsi üzrə qarşılıqlı əməkdaşlıq əlaqələrinin perspektivləri müzakirə olunub.

Bakı və Tehran beynəlxalq kitab sərgilərində qarşılıqlı fəaliyyət və nəşriyyat evlərinin təmsil olunması, kitab sənayesi sektoru üzrə əməkdaşlıq, ədəbiyyat sahəsində əlaqələrin genişləndirilməsi, Azərbaycan və İran yazarlarının əsərlərinin tərcümə mübadiləsi müzakirə edilən əsas məsələlərdən olub.

Qeyd edək ki, Mədəniyyət Nazirliyinin təşkilatçılığı və ölkəmizin İrandakı səfirliyinin dəstəyi ilə qurulan stenddə Azərbaycanın mədəniyyətinə, tarixinə, ədəbiyyatına, incəsənətinə dair 250-dən çox kitab, o cümlədən Qarabağ, Şuşa, Vətən müharibəsi və böyük Azərbaycan şairi Nizami Gəncəvi haqqında yeni çap olunmuş nəşrlər nümayiş etdirilir.

Mədəniyyət.- 2022.- 18 may.- S.2.