Mədəniyyət naziri Rabatda ICESCO-nun rəhbəri ilə görüşüb

Baş direktora Şuşa haqqında kitab və xatirə nişanı təqdim edilib

Mədəniyyət naziri Anar Kərimovun rəhbərlik etdiyi nümayəndə heyəti Mərakeş Krallığında səfərdədir. Səfər çərçivəsində noyabrın 20-də Rabat şəhərində, ICESCO-nun qərargahında Azərbaycan nümayəndə heyəti ilə görüş keçirilib.

Təşkilatın baş direktoru Salim bin Məhəmməd əl-Malik nümayəndə heyətini salamlayaraq, 2021-ci ilin yanvarında və cari ilin mayında ölkəmizə gerçəkləşən səfərlərindən söz açıb. O, Azərbaycan Prezidenti İlham Əliyevlə görüşlərini, habelə ölkəmizin Birinci vitse-prezidenti, ICESCO-nun xoşməramlı səfiri Mehriban xanım Əliyevanın fəaliyyətlərini və ICESCO-nun elan etdiyi “Qadınlar İli” çərçivəsində “Qadınlar və qızlar elmdə” Beynəlxalq Günü münasibətilə fevralın 11-də keçirilmiş videokonfrans formatında tədbirdə çıxışını məmnunluqla xatırlayıb. Hər iki səfərində ölkəmizin işğaldan azad edilmiş ərazilərini ziyarət etdiyini deyən Salim bin Məhəmməd əl-Malik Azərbaycana hər zaman sevə-sevə gələcəyini bildirib.

ICESCO-nun yeni strategiyasının təşkilatın beynəlxalq nüfuzunun artmasına ciddi təsir etdiyini bildirən nazir Anar Kərimov qlobal böhranlar dönəmində sülh, ədalət və inkişaf dəyərlərinə sadiq qalmağın önəmindən bəhs edib. Nazir bəzi təşkilatlardan fərqli olaraq, dini, milli və s. mənşəyinə rəğmən mədəni irsin qorunmasını siyasiləşdirməyən ICESCO-nun Azərbaycanın işğaldan azad edilmiş ərazilərinə gələn ilk beynəlxalq təşkilat olduğunu minnətdarlıqla qeyd edib.

Azərbaycan Prezidenti İlham Əliyevin təşəbbüsü ilə 2008-ci ildən elan edilmiş mədəniyyətlərarası dialoq naminə “Bakı Prosesi” çərçivəsində həyata keçirilən tədbirlərdə ICESCO-nun strateji tərəfdaş kimi iştirakından söz açan Anar Kərimov ölkəmiz tərəfindən 2021-ci ildə, postmüharibə dövründə elan edilmiş “Mədəniyyət naminə sülh” qlobal kampaniyasında da təşkilatın tərəfdaşlığının bizim üçün əlamətdar olduğunu deyib.

Azərbaycanın mədəniyyət paytaxtı Şuşanın bu il 270 illiyinin qeyd edilməsi haqqında məlumat verən nazir ICESCO-ya təqdim edilmiş “Şuşa – İslam Dünyasının Mədəniyyət Paytaxtı-2024” nominasiyasının da uğurlu olacağına ümidvar olduğunu bildirib.

Azərbaycan-ICESCO münasibətlərinin yüksələn xətlə inkişaf etdiyini vurğulayan nazir Prezident İlham Əliyev tərəfindən təşkilatın ölkəmizdə Regional Ofisinin açılması ilə bağlı sazişə dair müvafiq sərəncamın artıq imzalandığını məmnunluqla diqqətə çatdırıb.

Görüşdə ICESCO-nun müxtəlif bölmə rəhbərləri Azərbaycanla həyata keçirilən ortaq layihələrə dair nazirə məlumat veriblər.

Anar Kərimov ICESCO-nun rəhbərinə Şuşa haqqında kitab və Mədəniyyət Nazirliyinin Şuşanın 270 illiyinə həsr olunmuş xatirə nişanını təqdim edib.

Azərbaycan Respublikasının Mərakeş Krallığında fövqəladə və səlahiyyətli səfiri Nazim Səmədov görüşdə iştirak edib.

***

Görüşdən sonra Salim əl-Malik nazir Anar Kərimovu ICESCO-nun qərargahında yeni yaradılmış “Peyğəmbərin Yolu” muzeyi ilə tanış edib.

Bir neçə zaldan ibarət geniş və müasir muzeyin ekspozisiyasında Məhəmməd Peyğəmbərin həyatına, ailəsinə, eləcə də Məkkə və Mədinə şəhərlərinə həsr olunmuş dəyərli eksponatlar, ədəbiyyatlar, tarixi kitablar əyani və rəqəmsal formada sərgilənir.

Ekskursiyanın sonunda Anar Kərimov ölkəmiz adından muzeyə Azərbaycan dilində “Qurani-Kərim” hədiyyə edib. Qeyd edək ki, Anar Kərimov ICESCO qərargahında açılmış muzeylə tanış olan ilk xarici ölkə mədəniyyət naziridir.

Sonda ICESCO tərəfindən Azərbaycan nümayəndə heyətinin şərəfinə rəsmi ziyafət verilib.

***

Onu da əlavə edək ki, ICESCO-nun qərargahına ev sahibliyi edən Mərakeşin paytaxtı Rabat 2022-ci ildə həm də “İslam Dünyasının Mədəniyyət Paytaxtı”dır. Rabat bu il Misirin paytaxtı Qahirə şəhəri ilə müştərək bu missiyanı daşıyır.

ICESCO-nun “İslam Dünyasının Mədəniyyət Paytaxtı” proqramı 2005-ci ildən həyata keçirilir. İlk dəfə bu ada Məkkə şəhəri (Səudiyyə Ərəbistanı) layiq görülüb.

2006-cı ildən İslam dünyasının üç regionu – Ərəb regionu, Asiya regionu və Afrika üzrə “paytaxt” şəhərlər (ayrı-ayrı illərdə bir region üzrə iki şəhər) elan edilir.

2009-cu ildə Asiya regionu üzrə Azərbaycandan Bakı (Kuala Lumpur (Malayziya) ilə birlikdə), 2018-ci ildə isə Naxçıvan şəhərləri “İslam Dünyasının Mədəniyyət Paytaxtı” olub.

2022-ci ildə “İslam Dünyasının Mədəniyyət Paytaxtı” adının Asiya regionu üzrə daşıyıcısı Bandunq (İndoneziya), Afrika regionu üzrə isə Yaunde (Kamerun) şəhərləridir.

Mədəniyyət.- 2022.- 23 noyabr.- S.1;2.