Dövlət Nəfəs Alətləri Orkestri beynəlxalq festivalda çıxış edib
17-19 avqust tarixlərində
Rusiyanın Yekaterinburq
şəhərində IX Beynəlxalq
Nəfəs Alətləri
Orkestrləri Festivalı
keçirilib. Rusiya Mədəniyyət Nazirliyinin
dəstəyi ilə keçirilən festival (təşkilatçı – Rusiyanın
Əməkdar incəsənət
xadimi, “Ural-Band” orkestrinin rəhbəri Aleksandr Pavlov) Yekaterinburq şəhərinin
300 illiyinə həsr
olunub.
Azərbaycan Dövlət Nəfəs Alətləri Orkestri festivalda ölkəmizi təmsil edib. Bədii rəhbər-direktor
Əməkdar incəsənət
xadimi Əlibala Rzayevin başçılığı
ilə 36 nəfərlik
heyət Azərbaycan Respublikası Mədəniyyət
Nazirliyinin dəstəyi
ilə festivala qatılıb.
Eyni zamanda
Əməkdar artist Aqil Cəfərovun rəhbərliyi ilə Rusiyanın Krasnoyarsk vilayətində fəaliyyət
göstərən “Odlar
yurdu” Azərbaycan xalq mahnı və rəqs ansamblı da festivalda orkestrlə birgə çıxış
edib.
Rusiyanın müxtəlif
regionlarından və
Azərbaycandan ümumilikdə
9 kollektivin qatıldığı
festivalda rəngarəng
proqram təqdim olunub.
Azərbaycan kollektivi ilk gün “Kosmos” kinoteatrında festivalın
açılış konsertində
səhnəyə çıxıb.
Əlibala Rzayevin
dirijorluğu ilə aranjimanı özünə
aid olan Azərbaycan bəstəkarlarının
əsərlərindən ibarət
“Fantaziya” maraqla qarşılanıb. “Odlar
yurdu” xalq rəqs ansamblı və Dövlət Nəfəs Alətləri
Orkestrinin solisti, beynəlxalq müsabiqələr
laureatı Mahir Tağızadə Üzeyir
Hacıbəylinin “Cəngi”,
Rauf Hacıyevin “Bu bağlar”, Polad Bülbüloğlunun
“Şən Azərbaycan”,
Müslüm Maqomayevin
“Azərbaycan” əsərlərini
ifa ediblər.
Festivalın ikinci günü orkestr V.V.Mayakovski adına Mərkəzi mədəniyyət və
istirahət parkının
yay teatrında konsert proqramı ilə çıxış
edib. Ü.Hacıbəylinin
“Koroğlu” operasından
və “Arşın mal alan” musiqili
komediyasından uvertüralar,
“Cəngi”, P.Bülbüloğlunun
“Şən Azərbaycan”,
M.Maqomayevin “Azərbaycan”
və “Mavi əbədiyyət” və
s. əsərlər səsləndirilib.
Musiqi və rəqs nömrələri
böyük alqışlarla
qarşılanıb.
Festivalın üçüncü günü
8 mindən çox tamaşaçının iştirak
etdiyi, Yekaterinburqun 300
illiyinə həsr olunmuş paradda Azərbaycan orkestri də iştirak edib. Şəhərin əsas küçəsində
yürüşdə kollektivimiz
Azərbaycan bəstəkarlarının
marş janrlı əsərlərini ifa edib.
Daha sonra
Yekaterinburqun tarixi meydanında qurulan səhnədə festivalın
qala-konserti keçirilib.
Orkestrimiz rəqs ansamblı ilə Ü.Hacıbəylinin “Cəngi“
əsərini ifa edib. Festivala qatılmış bütün
orkestrlər birgə Rusiya Milli Musiqi
Muzeyinin baş direktoru Mixail Brızqalovun dirijorluğu
ilə Vasili Aqapkinin “Slavyan qızın vidası” marşını səsləndirib.
Azərbaycan Dövlət Nəfəs Alətləri Orkestrinin daha bir konserti
şəhərin böyük
ticarət mərkəzlərindən
birinin qarşısında
qurulan səhnədə
gerçəkləşib. Burada Azərbaycan bəstəkarlarının əsərləri
böyük maraqla qarşılanıb. Sonda orkestr festivalın təşkilat komitəsinin
diplomu ilə təltif olunub.
Azərbaycan Dövlət Nəfəs Alətləri Orkestri nümunəvi çıxışları ilə mədəniyyətimizin yüksək səviyyədə təqdimatına nail olub. Ölkəmizin Yekaterinburqdakı Baş konsulluğunun əməkdaşları da festival tədbirlərində yaxından iştirak ediblər.
Mədəniyyət.- 2023.- 23 avqust.- S.1;2.