Qeyri-maddi mədəni irs nümunələrimiz İslam Dünyası İrs Siyahısında

Dekabrın 18-19-da Mərakeşin paytaxtı Rabat şəhərində İslam Dünyası Təhsil, Elm və Mədəniyyət Təşkilatı – ICESCO-nun nəzdində fəaliyyət göstərən İslam Dünyası İrs Komitəsinin (IWHC) 11-ci iclası keçirilib.

Komitə üzvlərinin qərarı ilə ölkəmizin zəngin mədəniyyətini əks etdirən 10 qeyri-maddi mədəni irs nümunəsi İslam Dünyası İrs Siyahısına daxil edilib: Yallı (köçəri, tənzərə) Naxçıvanın ənənəvi qrup rəqsləri; Dolmanın hazırlanması və paylaşılması ənənəsi, mədəni kimliyin göstəricisi; Pəhləvanlıq mədəniyyəti, ənənəvi zorxana oyunları, idman növləri və güləş; Azərbaycan muğamı; Lahıc misgərlik sənəti; Çövkən – ənənəvi Qarabağ atüstü oyunu; Azərbaycan aşıq sənəti; Kəlağayı düzəldilməsi və geyinməsi ənənəvi incəsənəti və onun simvolizmi; Tar ifaçılıq sənəti və onun hazırlanma ustalığı; Azərbaycanda xalça toxuculuğu ənənəvi sənəti.

Dekabrın 19-da ICESCO-nun qərargahında keçirilən mərasimdə Azərbaycan Respublikası Mədəniyyət Nazirliyinin hazırladığı namizədlik faylları əsasında qeyd olunan elementlərin İslam Dünyası İrs Siyahısına daxil edilməsini təsdiq edən sertifikatlar ICESCO-nun baş direktoru Salim əl-Malik tərəfindən ölkəmizin qurumdakı daimi nümayəndəsi Nazim Səmədova təqdim edilib.

İslam Dünyası İrs Komitəsinin qərarı ilə Azərbaycan xalqına məxsus bu qeyri-maddi mədəni irs elementlərinin mühüm dəyəri vurğulanıb və mədəni irsin qorunması, mühafizəsi və davamlılığının təmin edilməsinin vacibliyi nümayiş etdirilib. Azərbaycanın ICESCO ilə əməkdaşlığında mədəni irsin qorunması mövzusu mühüm yer tutur.

Xatırladaq ki, daha öncə Azərbaycandan İçərişəhər (Qız qalası və Şirvanşahlar saray kompleksi ilə birlikdə), Şəkinin tarixi mərkəzi (Xan sarayı ilə birlikdə) və Qobustan qayaüstü rəsmləri, həmçinin miniatür sənəti və “Nar bayramı” ənənəsi İslam Dünyası İrs Siyahısına daxil edilib. Bununla da Azərbaycanın siyahıdakı mədəni irs nümunələrinin sayı 15-ə çatıb.

Qeyd edək ki, sözügedən nümunələr UNESCO-nun müvafiq siyahılarında da yer alıb.

Mədəniyyət .- 2023.- 20 dekabr(№94).- S.1.