Milli Kitabxana Macarıstanın rəqəmsal nəşr işi ilə bağlı təcrübəsindən yararlana bilər

ADA Universiteti Macarıstanın “Arcanum” rəqəmsal nəşriyyat qurumunun rəhbərliyini bir sıra görüşlər və birgə layihələr həyata keçirmək məqsədilə Azərbaycana dəvət edib.

Yanvarın 30-da “Arcanum”un icraçı direktoru Elöd Biszak Azərbaycan Milli Kitabxanasında olub.

Qonağa Milli Kitabxananın fəaliyyəti, o cümlədən burada həyata keçirilən digitallaşdırma işi haqqında ətraflı məlumat verilib. Qeyd edilib ki, kitabxanada 2008-ci ildən etibarən müstəqil şəkildə 1 milyondan artıq resurs digitallaşdırılıb. 2020-ci ildə Milli Kitabxana “Azərbaycanda milli elektron kitabxana” layihəsini irəli sürüb, lakin müəllif hüquqlarının qorunması ilə bağlı məsələlər tam həllini tapmadığından bu layihə hələlik həyata keçirilməyib.

Qeyd olunub ki, əgər “Azərbaycanda milli elektron kitabxana” layihəsi baş tutarsa, o zaman Macarıstanın “Arcanum” müəssisəsi kimi şirkətlərə müraciət edilə bilər.

Sonda direktor Kərim Tahirov qonağa Milli Kitabxana və Azərbaycan xalçaları haqqında kitablar, habelə Azərbaycanın tarix-mədəniyyət abidələrinin xəritəsini hədiyyə edib.

Mədəniyyət.- 2023.- 1 fevral.- S.3.