Basqal qoruğunda müasir turizm infrastrukturu yaradılır

İsmayıllı rayonunun Basqal qəsəbəsində ölkə başçısının “Basqal Dövlət Tarix Memarlıq Qoruğu haqqında” 2018-ci il 3 oktyabr tarixli sərəncamından irəli gələn tapşırıqların icrası məqsədilə Dövlət Turizm Agentliyi (DTA) tərəfindən turizm infrastrukturunun yaradılması üçün mərhələli şəkildə təmir, tikinti və bərpa işləri aparılır.

2022-ci ilin avqust ayında Prezident İlham Əliyev və birinci xanım Mehriban Əliyeva burada aparılan işlərlə tanış olublar.

İlkin mərhələdə Basqal qəsəbəsindəki bazar meydanı ərazisində XVII əsrə aid tarixi hamam bərpa edilib, 7 emalatxana təmir olunub. İkinci mərhələdə bazar meydanı ərazisində qoruq üçün inzibati bina tikilib, ərazidə abadlıq işləri aparılıb. Küçələrin 1600 metrlik hissəsində divarlar, döşəmələr, qapı və darvazalar bərpa olunaraq tarixi mühitə uyğunlaşdırılıb, küçələr işıqlandırılıb. Turizm məlumat mərkəzi tikilərək istifadəyə verilib.

Növbəti mərhələ üzrə görüləcək işlər barədə iyunun 5-də DTA-nın sədri Fuad Nağıyevin İsmayıllının Basqal qəsəbəsində vətəndaşlarla görüşündə söhbət açılıb. Sakinləri maraqlandıran suallar cavablandırılıb, onların fikirləri dinlənilib və müvafiq tapşırıqlar verilib.

Vətəndaşlarla görüşdə İsmayıllı rayonunun icra başçısı Nahid Bağırov da iştirak edib.

DTA-dan bildirilib ki, növbəti mərhələ üzrə Şeyx Məhəmməd və Hacı Bədəl məscidlərinin bərpası, Basqal Mədəniyyət evinin əsaslı təmiri, keçmiş məktəb binasının (çoxtəyinatlı turizm mərkəzi) əsaslı təmiri, 6 tarixi evin bərpası planlaşdırılır. Bununla yanaşı, Basqala səfər edən turistlərin sayı artan templə davam etdiyindən, Basqal meydanından Basqal tarixi qəbiristanlığa gedən yolun abadlaşdırılaraq turizm marşrutuna əlavə olunması, “Partizan Məmmədin evi”nin təmir olunaraq muzeyin yaradılması və digər işlər nəzərdə tutulur.

Mədəniyyət.- 2023.- 7 iyun.- S.4.