Bakıda II Türk Dünyası Ədəbiyyat və Kitab Festivalı keçirilir

Anar: “Türk dünyasının gəncliyi gələcəyə kitabla getməlidir”

İyunun 5-də – ölkəmizdə ənənəvi qeyd olunan Şairlər Günündə – Bakıda II Türk Dünyası Ədəbiyyat və Kitab Festivalının açılışı keçirildi.

İyunun 11-dək davam edəcək festival Beynəlxalq Türk Müəllifləri Birliyinin təşkilatçılığı, Azərbaycan Yazıçılar Birliyi (AYB), Azərbaycan Respublikası Mədəniyyət Nazirliyi, Milli Məclisin Mədəniyyət komitəsi, AMEA, Bakı Şəhər İcra Hakimiyyəti, Beynəlxalq Türk Mədəniyyəti və İrsi Fondu, Beynəlxalq Türk Akademiyası, TÜRKSOY, TÜRKPA, Yunus Əmrə İnstitutu, İLESAM və digər qurumların dəstəyi ilə gerçəkləşir.

Festivalın açılışı Azərbaycanın Dövlət Himninin səsləndirilməsi ilə başladı. Vətən uğrunda canından keçən şəhidlərin əziz xatirəsi bir dəqiqəlik sükutla yad edildi.

Sonra Birinci Qarabağ müharibəsi qazilərinin ifasında “Əsgərnamə elegiya” adlı musiqili kompozisiya təqdim olundu. Musiqili kompozisiyadan sonra Vətən müharibəsi iştirakçıları olan şairlər öz şeirlərindən nümunələr səsləndirdilər. Həmin şairlər həm də “İgidlərin sözü” layihəsinin (layihə rəhbəri Nigar Həsənzadə) iştirakçılarıdır.

Açılış mərasimində çıxış edən Azərbaycan Yazıçılar Birliyinin sədri Xalq yazıçısı Anar II Türk Dünyası Ədəbiyyat və Kitab Festivalının əlamətdar bir ildə – Azərbaycan xalqının Ümummilli lideri Heydər Əliyevin anadan olmasının və Türkiyə Cümhuriyyətinin yaranmasının 100 illiyinə təsadüf etdiyinə diqqət çəkdi.

Türk dünyasından nümayəndələrin bir araya gəldiyi kitab və ədəbiyyat bayramını yüksək dəyərləndirən Anar qeyd etdi ki, türk xalqlarının gəncliyi gələcəyə kitabla getməlidir. Çünki kitab, ədəbiyyat, mədəniyyət nəsilləri tərbiyə edir.

Milli Məclisin Mədəniyyət komitəsinin sədri Qənirə Paşayeva, AMEA-nın vitse-prezidenti akademik Dilqəm Tağıyev, millət vəkilləri, Xalq şairi Sabir Rüstəmxanlı, Cavanşir Feyziyev, Azərbaycanın TÜRKSOY-dakı nümayəndəsi Elçin Qafarlı, Beynəlxalq Türk Mədəniyyəti və İrsi Fondunun Qırğızıstan üzrə layihə rəhbəri Mirbek Karıbayev və başqaları çıxış edərək festivalın əhəmiyyətini yüksək qiymətləndirdilər.

Kitab və ədəbiyyat bayramı gün ərzində müxtəlif layihələrin təqdimatı ilə davam etdi.

Qeyd edək ki, bu il festival daha geniş proqramla kitab və ədəbiyyatsevərlərin görüşünə gəlib. Festival çərçivəsində müxtəlif tədbirlər, film nümayişləri ilə yanaşı, hər gün bir ölkəyə (Azərbaycan, Türkiyə, Qazaxıstan, Qırğızıstan, Özbəkistan və Macarıstan) həsr olunacaq.

Festivalda 50-dən çox nəşriyyat, 30-a yaxın xarici ölkə nümayəndəsi iştirak edir.

Tədbirdə iştirak edən Beynəlxalq Türk Akademiyasının nümayəndəsi Merjandos Badiloğlu (Qazaxıstan) jurnalistlərə müsahibəsində bildirdi ki, II Türk Dünyası Ədəbiyyat və Kitab Festivalında BTA türkşünaslıq və Türk dünyası ölkələrinin ədəbiyyatı ilə bağlı elmi nəşrləri təqdim edir: “Beynəlxalq Türk Akademiyası 17 ildir fəaliyyət göstərir, bu müddət ərzində dünyanın müxtəlif dillərində, o cümlədən Azərbaycan dilində 200-ə yaxın elmi əsər nəşr olunub. Tədbirdən sonra festivalda təqdim olunan nəşrləri Bakıdakı elm və təhsil müəssisələrinin kitabxanalarına hədiyyə edəcəyik. Türk dünyasının kitabları türk xalqlarının yaxınlaşmasına töhfə verir və böyük əhəmiyyət kəsb edir”.

Festivalın açılışında Bakıda səfərdə olan Latviya Universitetinin professoru Kaspars Klavinç də iştirak edirdi. Alim bizimlə söhbətində Koreya mədəniyyəti və dili sahəsində fəaliyyət göstərdiyini dedi: “Ancaq Azərbaycanın mədəniyyəti və tarixi ilə də maraqlanıram. Çünki Azərbaycanda müxtəlif mədəniyyətlər birləşir. Bakıya səfərimin məqsədi AMEA-nın Məhəmməd Füzuli adına Əlyazmalar İnstitutunda azərbaycanlı həmkarlarımla əməkdaşlıq əlaqələri qurmaqdır. Belə bir festivalın keçirilməsi böyük təşəbbüsdür, burada hər kəs lazımi nəşri tapa bilər”.

Onu da bildirək ki, paytaxtın Hüseyn Cavid prospektində AMEA-nın binasının qarşısındakı parkda təşkil olunan festivalda müxtəlif sahələrə dair nəşrlər, eləcə də rəngkarlıq və qrafika sənəti üzrə əl işləri təqdim edilir.

L.Azəri

Mədəniyyət.- 2023.- 7 iyun.- S.1;2.