Solmayan poeziya gülüstanı...
Nigar Rəfibəyli-100
İyunun 23-ü XX əsr Azərbaycan poeziyasının görkəmli
nümayəndəsi, Xalq
şairi Nigar Rəfibəylinin (1913-1981) anadan
olmasının 110-cu ildönümüdür.
Bu münasibətlə
şairin həyat və yaradıcılığı
haqqında bir sıra faktları oxucularımıza təqdim
edirik.
Gəncə şəhərində anadan
olan Nigar xanım ibtidai təhsilini burada alıb, 1930-cu ildə Bakı Pedaqoji Texnikumunu bitirib.
1932-1936-cı illərdə Moskvada Pedaqoji İnstitutda təhsilini davam etdirib. 1930-1932-ci illərdə Bakı kinostudiyasında, “Azərnəşr”də tərcüməçi
və redaktor,
1937-1939-cu illərdə “Uşaqgəncnəşr”də
redaktor işləyib.
1934-cü ildən Azərbaycan
Yazıçılar Birliyinin
(AYB) üzvü olub.
Nigar Rəfibəyli
milli ədəbiyyatı
lirikanın dəyərli
nümunələri ilə
zənginləşdirən sənətkardır. Vətənə
bağlılıq, insanın
mənəvi ucalığı
və yurdun əsrarəngiz təbiət
gözəlliklərinin özünəməxsus
tərzdə tərənnümü
onun yaradıcılığının
ideya-bədii leytmotivini
təşkil edib.
Şairliklə yanaşı, tərcümə
fəaliyyəti ilə
də məşğul
olub. Məhsəti Gəncəvinin rübailərini,
Evripidin “İfigeniya”,
F.Şillerin “Məkr və məhəbbət”,
A.P.Çexovun “Vanya dayı”, “Albalı bağı” dramlarını,
E.L.Voyniçin “Ovod”,
O.Qonçarın “Bayraqdarlar”
romanlarını, Ə.Nəvai,
A.Puşkin, M.Lermontov,
T.Şevçenko, A.Mitskeviç,
A.Sereteli və başqalarının əsərlərini
tərcümə edib.
Azərbaycan ədəbiyyatının inkişafında
mühüm xidmətlərinə
görə 1967-ci ildə
Azərbaycanın “Əməkdar
mədəniyyət işçisi”,
1981-ci ildə “Xalq şairi” fəxri adlarına layiq görülüb, “Şərəf
Nişanı” ordeni və medallarla təltif olunub.
Prezident İlham
Əliyevin sərəncamı
ilə 2013-cü ildə
Nigar Rəfibəylinin
100 illik yubileyi qeyd
olunub. Paytaxtın küçələrindən biri
onun adını daşıyır.
Atasını bolşeviklər güllələyib
Şairin atası
Xudadat bəy Rəfibəyli xalqının
azadlığı yolunda
mübarizə aparan ictimai-siyasi xadim idi. Azərbaycan Xalq Cümhuriyyətinin ilk səhiyyə naziri, daha sonra
Gəncə şəhərinin
general-qubernatoru olmuşdu.
1920-ci il aprelin 28-də
bolşevik Rusiyası
Azərbaycanı işğal
edəndən sonra may ayında həbs olunur və məhkəmənin
hökmü ilə Bakıya gətirilərək
Nargin adasında güllələnir.
İlk şeiri
və ilk kitabı
Nigar Rəfibəylinin
“Çadra” adlı ilk şeiri 15 yaşında, 1928-ci ildə
“Dan ulduzu” jurnalında dərc edilib. İlk şeirindən ədəbi
mühitdə rəğbətlə
qarşılanan şairin
birinci kitabı
1934-cü ildə nəşr
olunub.
Nigar Rəfibəyli
yaradıcılığında uşaqları da unutmayıb, onlar üçün bir-birindən
maraqlı şeirlər
qələmə alıb.
Şairin “Balaca qəhrəman” (1942), “Günəşin
cavabı” (1966), “Məstanın
balaları” (1968), “Bizə
bahar yaraşır”
(1978) kitabları balaca
oxucularının sevdiyi
kitablardan olub.
Şair bundan
başqa, “Zəfər
nəğməsi” (1943), “Şeirlər”
(1949), “Anaların səsi”
(1951), “Yol xatirələri”
(1957), “Dənizin səsi
gəlir” (1964) və
s. kitabların müəllifidir.
Toylarında Cavidlə Müşfiq də iştirak edib...
Nigar xanım
1937-ci ildə şair
Rəsul Rza ilə ailə həyatı qurur. Qızları Fidan Rzayeva müsahibələrinin
birində bu haqda deyir: “Onların
toyu elə yaşadıqları balaca
daxma kimi evdə keçirilib. Sonradan repressiya olunan adamların bir çoxu, eləcə də Hüseyn Cavid, Mikayıl Müşfiq də onların toyunda iştirak ediblər. Atamgilin toyu ədəbiyyat adamlarının axırıncı
məclisi olub. Bu məclisdən sonra onların hamısını bir-bir aradan götürüblər”.
İldən uzun gecələr...
1981-ci ildə Nigar xanımda ağır xəstəlik
aşkar olunur. Xəstəlik artıq irəliləmişdi. Həkimlər
onu müalicə üçün Moskvaya aparmağı məsləhət
görürlər. Bir
müddət idi Rəsul Rza da xəstəxanada müalicə olunurdu. Aprelin 1-də oğulları
Anar anasının səhhəti ilə bağlı xəbəri Rəsul Rzaya demək üçün xəstəxanaya gedir. Xəbəri eşidən
Rəsul Rzanın həyəcandan təzyiqi
yüksəlir və dünyasını dəyişir.
Həyat yoldaşının
vəfat xəbərini
Nigar xanıma söyləmirlər...
Həmin ərəfələrdə
Emin Sabitoğlu Nigar Rəfibəylinin
40-cı illərdə yazdığı
“Neyləyim” şeirinə
sonradan böyük populyarlıq qazanan mahnı (“Alagözlüm”)
bəstələmişdi.
Mahnının tarixi barədə Azərbaycan Yazıçılar
Birliyinin sədri Xalq yazıçısı
Anar müsahibələrinin
birində deyib: “Atamın vəfatından sonra bir gün
Emin mənə dedi ki, Nigar
xalanın sözlərinə
təzə bir mahnı bəstələmişəm.
Amma sən verən mətnlərdən
deyil, köhnə bir şeiridir. Həmin mahnını Akif İslamzadənin ifasında lentə yazdırmışdı. Bir
gün lenti də, maqnitofonu da xəstəxanaya gətirdik. “Qoy Nigar xala özü
də eşitsin” dedi. Mən mahnının hansı şeirə bəstələndiyini
bilmirdim və təəccüblənirdim ki,
görən niyə Emin əlində təzə mətnlər ola-ola köhnə şeirə müraciət
edib. Mahnının ilk sözlərini eşidən kimi hər şeyi başa düşdüm:
Alagözlüm, səndən ayrı gecələr
Bir il kimi uzun olur,
neyləyim!
Bağçamızda qızılgüllər
hər səhər
Tezdən
açır, vaxtsız
solur, neyləyim!
Məhz
bu sözlər – artıq dünyadan köçmüş insanı
haraylaması – bəstəkarın
qəlbini tərpətmişdi;
çağırdığı adamın yoxluğunu Emin bilirdi, Akif bilirdi, hamı bilirdi, anam bilmirdi
tək”.
Və aradan keçən üç ay...
Bir müddət sonra həkimlər Nigar xanımın xəstəliyinin
əlacsız olduğunu
etiraf edirlər. Onu evlərinə gətirirlər. Nigar Rəfibəyli 1981-ci il iyulun
9-da – ömür-gün yoldaşının
vəfatından üç
ay sonra – dünyasını
dəyişir.
Xalq şairinin tək “Neyləyim” şeiri deyil, bir çox
poeziya nümunələri
nəğməyə dönüb
tanınmış müğənnilərin
ifasında qəlblərə
həzinlik gətirib.
Şeirləri ilə
bərabər, sözlərinə
yazılan mahnılar
da bu gün də oxunur, gələcəkdə də
oxunacaq...
Hazırladı: N.Məmmədli
Mədəniyyət.-
2023.- 23 iyun.- S.6.