Milli Xalça Muzeyində interaktiv tamaşa və mühazirə

2023-cü ildə Beynəlxalq Muzeylər Gününün “Muzeylər, dayanıqlılıq və rifah” mövzusuna həsr olunması əsas diqqəti qlobal sağlamlıq və rifah, iqlim dəyişikliyi sahəsində fəaliyyətə, yerüstü ekosistemin mühafizəsinə yönəldir, muzeyləri bu istiqamətdə maarifləndirmə işlərini gücləndirməyə çağırır.

Azərbaycan Milli Xalça Muzeyində əlamətdar günün mövzusuna uyğun olaraq mayın 18-də “Təbiətin səsi sən ol!” adlı interaktiv tamaşa göstərilib.

Muzeyin Uşaq şöbəsi tərəfindən hazırlanan tamaşada şöbənin nəzdində yaradılmış uşaq birliyinin üzvləri və 132-134 nömrəli təhsil kompleksinin şagirdləri, həmçinin “Azəri inciləri” rəqs qrupu çıxış edib. Yerüstü ekosistemin mühafizəsi mövzusuna həsr olunan, insanları təbiəti sevməyə və qorumağa səsləyən tamaşa sonda məzmuna uyğun art obyektin nümayişi ilə bitib.

Həmin gün muzeydə həmçinin “İqlim dəyişmələri qlobal ekoloji problem kimi” adlı mühazirə keçirilib. İqlim dəyişikliyi, biomüxtəlifliyin itirilməsi kimi əhəmiyyətli qlobal problemlərlə bağlı maarifləndirmə məqsədi daşıyan mühazirə İqlim Dəyişmələri Mərkəzinin direktoru Cəmilə Məmmədova tərəfindən təqdim edilib.

Mədəniyyət.- 2023.- 19 may.- S.2.