Pianoçu Adilə Əliyevaya Fransanın “Fəxri Legion” ordeni təqdim olunub

“Müstəsna barmaqları, mükəmməl zövqü və heyrətamiz emosiyaları olan ifaçıdır...”

Fransanın Azərbaycandakı Səfirliyində soydaşımız, tanınmış musiqiçi, Azərbaycanın Əməkdar artisti Adilə Əliyevaya bu ölkənin “Fəxri Legion” ordeninin təqdim olunması mərasimi keçirilib.

Tarixi vətəninin hüdudlarından kənarda da şöhrət qazanmış Adilə Əliyeva 30 ildən çoxdur Fransada yaşayır. Tanınmış pianoçu Fransa Prezidentinin 2022-ci il 13 iyul tarixli fərmanı ilə dünyada klassik musiqinin təbliğinə görə bu ölkənin ən yüksək dövlət mükafatı olan “Fəxri Legion” ordeninin kavaler dərəcəsi ilə təltif olunub. Fransanın milli bayramı ərəfəsində imzalanan fərmanda bildirilib ki, pianoçu, klassik musiqi festivalının təsisçisi Adilə Əliyeva musiqi sahəsində 46 illik xidmətinə əsasən bu mükafata layiq görülüb.

Ondan bir neçə gün əvvəl isə Adilə Əliyeva Azərbaycan Prezidentinin sərəncamı ilə Azərbaycan musiqisinin dünyada tanıdılması, gənc nəsil musiqiçilərin hazırlanmasında xidmətlərinə, habelə Fransada onun adını daşıyan mötəbər beynəlxalq müsabiqənin təşkilinə görə “Dostluq” ordeni ilə təltif edilib.

Mərasimdə çıxış edən Fransanın ölkəmizdəki səfiri Ann Buayon bildirib ki, bu mükafat Napoleon Bonapart tərəfindən 1802-ci ildə cəngavər ordenləri nümunəsində təsis olunub. Ordenin kavaleri titulu Fransada böyük xidmətlərə görə verilir.

Bakı şəhərində anadan olan Adilə Əliyeva Bülbül adına Orta İxtisas Musiqi Məktəbini və Pyotr Çaykovski adına Moskva Dövlət Konservatoriyasını bitirib. Onun 50-dən çox ölkədə konsertləri təşkil edilib.

Adilə Əliyeva pianoçuların bir çox mötəbər beynəlxalq müsabiqələrinin laureatıdır. Onun solo konsertlərinin səs yazısı, o cümlədən Ulu öndər Heydər Əliyevə və BMT-də Azərbaycan Gününə həsr etdiyi ifaları müxtəlif ölkələrin televiziya və radio arxivlərində saxlanılır, habelə kompakt-disk və DVD şəklində buraxılıb.

Adilə Əliyeva konsert fəaliyyəti ilə yanaşı, BMT-nin sülh elçisi qismində Azərbaycan musiqi sənətini dünyada təbliğ edərək böyük işlər görür. Onun sülh elçisi kimi ideyalarından biri Azərbaycan və Fransanın şəhərləri arasında çoxtərəfli münasibətlərin inkişafıdır. Pianoçu Fransa nümayəndə heyətinin tərkibində öz əcdadlarının vətəni olan Şamaxıda olub, onun səyləri nəticəsində bu şəhərlə Fransanın Qayar şəhəri qardaşlaşıb.

Pianoçunun daha bir təşəbbüsü onun adını daşıyan beynəlxalq musiqi müsabiqəsidir (“Adilia Alieva International Music Competition”). 1996-cı ildən etibarən Fransada və İsveçrədə iki ildən bir təşkil edilən müsabiqə dünyanın müxtəlif ölkələrindən, o cümlədən Azərbaycandan olan istedadları üzə çıxarır, onları tanıdır və təhsillərinin xaricdə davam etdirilməsi üçün şərait yaradır. Artıq ənənə halını alan və populyar olan bu tədbir Fransanın mədəni həyatının ayrılmaz hissəsinə çevrilib.

Fransanın Annemas şəhərində yaşayan A.Əliyeva 2001-ci ildən Fransa Beynəlxalq Musiqi Akademiyasının direktorudur. Burada özünün görkəmli müəllimlərinin prinsiplərini həyata keçirərək və malik olduğu zəngin təcrübəyə əsaslanaraq müxtəlif səviyyədə və yaşda olan tələbələrin hazırlanmasının effektiv təhsil sistemini yaradıb.

“Nyu-York Tayms” qəzetinin nüfuzlu musiqi tənqidçilərindən biri, “Motsartdan bizim zamanımıza qədər” ensiklopediyasının müəllifi Harold Şonberq “American Record Guide” nəşrinin səhifələrində yazıb ki, “Adilə Əliyeva müstəsna barmaqları, mükəmməl zövqü və heyrətamiz emosiyaları olan gözəl pianoçudur. O, musiqidə ən yüksək zirvəyə yüksəlib”.

Adilə Əliyevanın “Fəxri Legion” ordeni ilə təltif olunması onun fransız mədəniyyətinə töhfələrinə də verilən yüksək qiymətdir.

Qeyd edək ki, Fransanın yüksək dövlət təltifi olan “Fəxri Legion” ordeninin üç fərqlənmə dərəcəsi var: kavaler (al lent üzərində gümüş nişan), zabit (rozetli lentdə qızıl nişan) və komandor (al lent üzərində qızıl nişan).

Mədəniyyət.- 2023.- 26 may.- S.1;3.