Mətbuat salnaməmizdə əbədi yaşamaq haqqı...

Sentyabrın 25-i ustad jurnalist, yazıçı, uzun illər “Mədəniyyət” qəzeti redaksiyasında çalışmış Tahir Abbaslının (1948–2021) anadan olmasının 75-ci ildönümü idi.

Ömür vəfa etsəydi, kollektiv olaraq bu yubileyi mütləq qeyd edəcəkdik. Sadiq oxucuları hələ neçə-neçə sanballı publisistika örnəyini oxuyacaqdı. Axı o, mətbuat salnaməmizdə əbədi yaşamaq haqqı olan yazılar qələmə alırdı. Mövzuları rəngarəng, deyim-duyumu bənzərsiz, həm də milli ruhla süslü...

Redaksiyamız istedadlı həmkarımızın vəfatının birinci ildönümü münasibətilə onun vaxtilə “Mədəniyyət” qəzetində dərc olunmuş yazılarının bir qisminin yer aldığı “Publisistik taktlar” (2022) adlı kitabı nəşr etdirdi. Kitabda “Musiqidə obrazlaşanlar”, “Söz ömrü qazananlar”, “Səhnə və ekran fədakarları”, “Rənglərin dünyasından” və “Tarixi yaddaş” adlı bölmələr üzrə müəllifin 55 məqaləsi toplanıb.

75 illiyi münasibətilə hörmətli iş yoldaşımızı rəhmətlə yada salır, onun böyük Azərbaycan şairi Məhəmmədhüseyn Şəhriyar haqqında 2018-ci ilin təxminən bu vədələrində qələmə aldığı yazısını yenidən oxucularımıza təqdim edirik.

Mədəniyyət.- 2023.- 27 sentyabr.- S.6.