Yerlərdən müxtəlif səpkili xəbərlər

Quba-Xaçmaz RMİ-nin təşkilatçılığı ilə Quba rayon Mərkəzi Kitabxanasının Uşaq şöbəsi tərəfindən Vətən müharibəsi şəhidi baş çavuşu Surxay Mehdiyevin doğum günü ilə əlaqədar “Şəhidlər bizim qürur mənbəyimizdir!” adlı tədbir keçirilib.

Surxay Mehdiyev 1985-ci il dekabrın 7-də Ağdam rayonunun Xıdırlı kəndində anadan olub. 2020-ci ildə 44 günlük Vətən müharibəsi zamanı Cəbrayılın və Füzulinin azadlığı uğrunda gedən döyüşlərdə iştirak edib. Oktyabrın 19-da Füzuli döyüşləri zamanı şəhid olub. Ölkə başçısının müvafiq sərəncamları ilə ölümündən sonra “Vətən uğrunda” və “Cəbrayılın azad olunmasına görə” medalları ilə təltif edilib.

***

Şəki-Zaqatala RMİ-nin təşkilatçılığı və Şəki-Zaqatala RGİİ-nin dəstəyi ilə regional idarənin tabeliyindəki mədəniyyət müəssisələrinin işçiləri arasında intellektual oyun keçirilib. Şəki, Zaqatala, Balakən, Qax, Qəbələ və Oğuz rayonları üzrə 6 komanda biliyini nümayiş etdirib.

Final mərhələsinin 10-15 dekabr tarixlərində keçirilməsi nəzərdə tutulur. Yekunda ilk üç yeri tutan komanda Şəki-Zaqatala RMİ-nin fəxri fərmanı ilə təltif olunacaq. Digər iştirakçılara sertifikatlar təqdim ediləcək.

***

Masallı rayon Heydər Əliyev Mərkəzində Masallı rayon Nəriman Nərimanov adına şəhər 2 saylı tam orta məktəbin şagirdlərinin iştirakı ilə “Ulu öndərin ömür yolu vətənə və xalqa xidmət nümunəsidir” mövzusunda tarix dərsi keçirilib. Heydər Əliyevin ömür yolu və dövlətçilik fəaliyyəti ilə yanaşı, müxtəlif tarixi dövrlərdə Azərbaycanın ictimai-siyasi həyatında, mədəniyyət, iqtisadiyyat, idman sahələrində baş verən önəmli hadisələr barədə məlumatlar diqqətə çatdırılıb.

***

Lerik rayon Heydər Əliyev Mərkəzində Lənkəran-Astara RGİİ-nin təşkilatçılığı ilə 5 dekabr – Beynəlxalq Könüllülər Günü münasibətilə “Könüllülük – gənclərin yeni inkişaf modeli” adlı dəyirmi masa keçirilib.

Gənclər əvvəlcə Heydər Əliyev Mərkəzinin ekspozisiyası ilə tanış olublar. Sonra Azərbaycanda könüllülük hərəkatının tarixi haqqında gənclərə ətraflı məlumat verilib.

Mədəniyyət .- 2024.- 6 dekabr(№91).- S.4.