Memarlıq keramikasının bərpası: texnologiyalar, nümunələr

“De Bur sarayının kaminləri” elmi-tədqiqat layihəsi üzrə mühazirə

Azərbaycan Milli İncəsənət Muzeyi Mədəniyyət Nazirliyi ilə birgə və Bakıdakı Rus Evinin “Humanitar Missiya Proqramı”nın dəstəyi ilə “De Bur sarayının kaminləri” adlı elmi-tədqiqat layihəsinə başlayıb.

Birgə elmi-tədqiqat işinin aparılması üçün Rusiyadan “Keramarx” Memarlıq Bədii Keramika Muzeyinin direktoru Konstantin Lixolat, Rusiyanın Əməkdar mədəniyyət işçisi, muzeyin kuratoru Mariya Makoqonova və elmi müşaviri, iqtisad elmləri namizədi Andrey Rodenkov Azərbaycana dəvət olunublar.

Mütəxəssislər bir sıra görüşlər keçirməyi, De Bur sarayının (Azərbaycan Milli İncəsənət Muzeyinin binası) interyerinə baxmağı, muzeyin fondlarını öyrənməyi, kaminlərin (divar sobalarının) fotoşəkillərini çəkməyi, kamin elementlərini ölçməyi planlaşdırırlar. Həmçinin Bakı şəhərinin bəzi tarixi binalarında memarlıq keramikası mövzusunda fondların və sərgilərin öyrənilməsi nəzərdə tutulur.

Layihə çərçivəsində memarlıqda bədii keramika, onun öyrənilməsi, bərpası və sərgilənməsi ilə bağlı mühazirələr də nəzərdə tutulub.

Dekabrın 4-də Milli İncəsənət Muzeyində “Memarlıq keramikasının bərpası. Texnologiyalar. Nümunələr” mövzusunda mühazirə dinlənilib.

“Keramarx” Memarlıq Bədii Keramika Muzeyinin və “Pallada” bərpa-istehsalat şirkətinin direktoru Konstantin Lixolat mühazirəsində bərpa prosesinin çətinlikləri və incə məqamlarından danışıb, mədəni irsin qorunub saxlanılmasının vacibliyini vurğulayıb. O, çıxışında müəyyən tarixi dövrlərdə istifadə olunan ənənəvi texnologiyalar və materiallara xüsusi diqqət yetirib. Bundan əlavə, dinləyicilər keramika bəzəklərinin simvolikası haqqında maraqlı faktlar öyrəniblər. Mühazirədə tarixi obyektlərin mədəni dəyərinə xələl gətirmədən necə qorunub saxlanılmasından da bəhs edilib.

Sonda K.Lixolat auditoriyanın suallarını cavablandırıb.

Dekabrın 5-də layihə üzrə daha bir mühazirə “Sərgi və kolleksiya fəaliyyətlərinə əsas yanaşmalar” (mühazirəçi: M.L.Makoqonova) mövzusuna həsr olunub

Dekabrın 7-də isə “Keramarx” Muzeyinin nəşr layihələrinin icmalı” (mühazirəçi: A.İ. Rodenkov) mövzusunda mühazirə olacaq.

***

De Bur sarayı XIX əsrin sonlarında Bakının neft milyonçularından olan Lev de Burun adı ilə bağlıdır. Memar Nikolay fon der Nonnenin layihəsi üzrə binanın təməli 1889-cu ildə qoyulub, lakin həmin il De Bur vəfat edib. Bundan sonra bina milyonçunun təsisçilərindən olduğu “Kaspi Tərəfdaşlığı” Səhmdar Cəmiyyəti tərəfindən 1891–1893-ci illərdə inşa edilib. Saray sovet dövründə dövlət əhəmiyyətli bina olub. 1951-ci ildən burada Milli İncəsənət Muzeyi yerləşib.

Mədəniyyət .- 2024.- 6 dekabr(№91).- S.3.