Gənc vokalçının sənət arzuları

Demək olar ki, bütün insanlar narahatlıq, sevinc, ağrı və kədərini daha çox səs vasitəsilə büruzə verirlər. Musiqi səsi isə tamam başqa bir aləmdir. Məsələn, bir tenorun ifasını küləklə müqayisə etmək olar – güc, enerji, eyni zamanda gizli bir narahatlıq...

“Uğur sorağında” rubrikasında 2023-cü ildə Uşaq İncəsənət Festivalının mükafatçısı olmuş vokalçı Atilla Məmmədovu oxucularımıza tanıdırıq.

Atilla Yasin oğlu Məmmədov 2007-ci ildə Bakı şəhərində anadan olub. Cövdət Hacıyev adına 3 nömrəli onbirillik Musiqi məktəbinin məzunudur. Hazırda Üzeyir Hacıbəyli adına Bakı Musiqi Akademiyasında təhsil alır. Eyni zamanda “Bülbül vokal məktəbi”nin müdavimidir.

Dediyinə görə, beş yaşından musiqi ilə məşğul olur: “Anam musiqi müəllimidir. Elə ilk dəfə anamın apardığı xor dərsində oxumağa başlamışam. Səsimin və eşitmə qabiliyyətimin yaxşı olduğunu anam kəşf edib. Yeddi yaşımda beynəlxalq və respublika müsabiqələrində iştirak edirdim. Ən çox yadımda qalan və ilk uğuruma səbəb olan yarışmalardan biri “Zima” festivalı oldu ki, orada məni görüb Azərbaycan Dövlət Akademik Musiqili Teatrına dəvət etdilər”.

Teatrın direktoru Əməkdar incəsənət xadimi Əliqismət Lalayev kiçikyaşlı aktyor barədə yüksək fikirdədir: “Azərbaycanda xüsusi qabiliyyəti ilə seçilən uşaqlara dövlət tərəfindən həmişə diqqət və qayğı göstərilir. Səs imkanlarına görə yaşıdlarından fərqlənməyi bacaran Atilla Məmmədov da onların sırasındadır. Uşaq yaşlarından ifaçılığa başlayan, beynəlxalq müsabiqə və festivalların mükafatçısı olan bu balaca oğlanın adı 2017-ci ildə Prezident İlham Əliyevin müvafiq sərəncamı ilə gənc istedadların “Qızıl kitabı”na yazılıb və Prezident təqaüdünə layiq görülüb. Həmin ildən Akademik Musiqili Teatrda çalışan Atilla 2019-cu ildə premyerası olan “Balaca şahzadə” tamaşasında baş rolu canlandırmaq üçün müsabiqə vasitəsilə qəbul edilib və tam məsuliyyətlə vurğulaya bilərəm ki, biz seçimimizdə yanılmamışıq”.

Atilla Gürcüstanda “Wonder Land”, ABŞ-də “Florida keys” və ölkəmizdə keçirilən “Testene art” müsabiqələrində birinci yerə layiq görülüb. Türkiyədə “O səs çocuqlar”, Rusiyada “Var səsi ilə” (“Во весь голос”) kimi bir çox televiziya müsabiqələrində iştirak edib.

Otən il isə ölkəmizdə keçirilən Uşaq İncəsənət Müsabiqəsində akademik vokal nominasiyası üzrə 14-17 yaş kateqoriyasında II yeri qazanıb. Bu barədə özü belə deyir: “Uşaq İncəsənət Festivalı mənim üçün çox yaddaqalan oldu. Bu festival ərzində mən çox çalışdım, hər mərhələsində yeni əsərlər öyrənməklə yanaşı, maraqlı ifaçılarla tanış oldum...”.

Gənc vokalçının məqsədi bu sənətin sirlərini daha da dərindən öyrənib püxtələşmək, gələcəkdə ölkəmizi dünyada layiqincə təmsil etməkdir.

Müəllimi, Fikrət Əmirov adına Gəncə Dövlət Filarmoniyasının direktoru, “Bülbül vokal məktəbi”nin yaradıcısı Əməkdar artist Ramil Qasımov onu uşaq yaşlarından tanıdığını bildirir: “Onun səsinə lap erkən yaşlarından bələdəm. Atilla çox istedadlı və səs tembri maraqlı olan ifaçıdır. Hazırda biz onunla vokal texnikası üzərində işləyirik. Mən ona düzgün ifa tərzi, nəfəs, sözlərin, frazaların dəqiq deyiliş qaydası, eyni zamanda əsərin düzgün xarakter həlli kimi klassik vokala aid məqamları aşılamağa çalışıram. Əminəm ki, Atilla bütün ümidləri doğruldacaq. Ona uğurlar diləyirəm”.

Nurəddin

Mədəniyyət .- 2024.- 13 dekabr(№92-93).- S.7.