Yeni yarışma gəlir

Dekabrın 16-dan 20-dək Elm və Təhsil Nazirliyi, Mədəniyyət Nazirliyi və Bülbül adına Orta İxtisas Musiqi Məktəbinin təşkilatçılığı ilə Kövkəb Səfərəliyeva adına Violin İfaçılarının I Beynəlxalq Festival-Müsabiqəsi keçiriləcək.

Müsabiqənin münsiflər heyətinə görkəmli violin ifaçısı, Luqano, Astana və Yerusəlim musiqi akademiyalarının professoru Robert Konetti rəhbərlik edəcək.

Müsabiqənin açılışı Bülbül adına məktəbdə olacaq. Sonrakı iki gündə müsabiqəyə qatılanlar öz bacarıqlarını göstərəcəklər.

Müsabiqəyə Azərbaycanla yanaşı, ABŞ, Hindistan, Polşa, İsrail və başqa ölkələrdən gənc istedadlar qatılacaq.

Yarış günlərində Robert Konetti (violin) və Bella Konetti (viola) kimi görkəmli ifaçılar məktəblilərə ustad dərsi keçəcəklər.

Kövkəb Səfərəliyeva adına Violin İfaçılarının I Beynəlxalq Festival-Müsabiqəsi qaliblərinin mükafatlandırılması və qaliblərin konserti 19 dekabr tarixində Kamera və Orqan Musiqisi Zalında baş tutacaq.

Gülcah

Mədəniyyət .- 2024.- 13 dekabr(№92-93).- S.5.