Xalq şairi Hüseyn Arif yad olundu

XX əsr Azərbaycan poeziyasının görkəmli nümayəndələrindən Dövlət mükafatı laureatı, Əməkdar incəsənət xadimi, Xalq şairi Hüseyn Arifin (Hüseyn Camal oğlu Hüseynzadə; 1924–1992) bu il anadan olmasının 100 illiyidir. Yubiley münasibətilə il ərzində tədbirlər keçirilib.

Bu silsilədən daha bir tədbir dekabrın 11-də Müslüm Maqomayev adına Azərbaycan Dövlət Akademik Filarmoniyasında gerçəkləşdi.

Azərbaycan Yazıçılar Birliyi Poeziya şöbəsinin rəhbəri İbrahim İlyaslı tədbiri açaraq şairin həyat və yaradıcılıq yolundan danışdı. Diqqətə çatdırdı ki, Hüseyn Arif xalqımızın zəngin bədii-poetik irsi zəminində dəyərli əsərlər meydana gətirib. Şairin qayəsi, məramı Vətənə məhəbbət, mənəvi-əxlaqi zənginliklər və təbiət gözəlliklərinin tərənnümüdür.

Azərbaycan Aşıqlar Birliyinin sədri professor Məhərrəm Qasımlı qeyd etdi ki, Hüseyn Arif çox zəngin ədəbi irs yadigar qoyub. O, dolğun yaradıcılıq fəaliyyəti dövründə məna və mövzu baxımından dəyərli poeziya nümunələri qələmə alıb. Hüseyn Arifin çoxsaylı şeirlərinə mahnılar bəstələnib. Əsərləri xarici dillərə tərcümə olunub. Şair özü də qələmini tərcümə sahəsində sınayıb. Müxtəlif xalqların ədəbiyyatından tərcümələr edib.

Qeyd olundu ki, Hüseyn Arifin yaradıcılığında təbiət haqqında şeirləri üstünlük təşkil edir. “Təbiət düşünür”, “Şaxtadan göyərmiş payız çiçəyi”, “Dəyişib rəngini qaralan bulaq”, “Bulanıb gözündən kor olan bulaq”, “Atası torpaqdır, anası meşə” və bu qəbildən digər şeirləri onun təbiət aşiqi olduğunu göstərir.

Görkəmli sənətkar həm də qədirşünaslığı ilə diqqət çəkib. Aşıqlar Birliyi məhz onun qayğıkeş fəaliyyəti nəticəsində 1984-cü ildə yaradılıb. Şairin ədəbiyyatımızın inkişafına verdiyi töhfələr dövlət tərəfindən yüksək qiymətləndirilib. O, 1984-cü ildə “Əməkdar incəsənət xadimi”, 1989-cu il ildə “Xalq şairi” fəxri adlarına layiq görülüb.

Tədbirdə daha sonra Dövlət İmtahan Mərkəzi İdarə Heyətinin sədri Məleykə Abbaszadə, Milli Məclisin deputatı filologiya elmləri doktoru Elnarə Akimova və başqaları çıxış edərək görkəmli sənətkarın yaradıcılıq yolundan və onunla bağlı xatirələrindən söz açdılar.

Bildirildi ki, həyat və təbiət aşiqi olan şair ömrünün müdrik çağlarında kədərli günlər yaşayıb. 1976-cı ildə oğlu Arif Hüseynzadə faciəli şəkildə dünyasını dəyişir. O bu vaxtsız itkidən bərk sarsılır.

Çıxışlardan sonra konsert proqramı təqdim edildi.

F.Əmirov adına Azərbaycan Dövlət Mahnı və Rəqs Ansamblının müşayiəti ilə (bədii rəhbər və baş dirijor: Xalq artisti Ağaverdi Paşayev, musiqi rəhbəri Mahir İbrahimov) Əməkdar artist Almaz Orucova, Əməkdar mədəniyyət işçisi Aşıq Samirə, müğənnilər Vəfa Vəzirova, Rəvanə Qurbanova, Nurlanə Abdullayeva, aşıqlar Elməddin Məmmədov, Əli Tapdıqoğlu, Avdı Musayev şairin sözlərinə bəstələnmiş mahnıları və saz havalarını ifa etdilər. Xalq artisti Sabir Məmmədov, respublika və beynəlxalq müsabiqələr laureatları Rəşad Dadaşov, Hüseynağa Aslanov və Firuzə İsmayıl şairin şeirlərini səsləndirdilər.

Sonda şairin nəvəsi Tural ailələri adından tədbirin təşkilatçılarına və iştirakçılarına təşəkkür etdi.

S.Fərəcov

Mədəniyyət .- 2024.- 13 dekabr(№92-93).- S.1;2.