90 illik yubileyin son tədbirləri

Azərbaycan Bəstəkarlar İttifaqının (ABİ) 90 illik yubileyi il ərzində silsilə tədbirlərlə qeyd edildi. Bakıda, Gəncədə, Şuşada, Şəkidə, eləcə də bir sıra ölkələrdə yubileyin sədası eşidildi.

Noyabrın 22-də bəstəkarların simfonik əsərləri M.Maqomayev adına Azərbaycan Dövlət Akademik Filarmoniyasında Ü.Hacıbəyli adına Azərbaycan Dövlət Simfonik Orkestrinin ifasında (dirijor M.Mehmandarov) səsləndirildi. 23 noyabrda ittifaqın Ü.Hacıbəyli adına konsert salonunda bəstəkarların yeni əsərlərindən ibarət kamera-vokal konserti, R.Behbudov adına Mahnı Teatrında yeni mahnılardan ibarət konsert, 25 noyabrda isə Azərbaycan Dövlət Xalq Çalğı Alətləri Orkestrinin ifasında (dirijor Xalq artisti A.Paşayev) bəstəkarların əsərləri təqdim olundu.

Dekabrın 9-da yubiley silsiləsinin son iki tədbiri gerçəkləşdi. Bunlardan biri uşaq musiqisinə həsr olunan elmi-praktiki konfrans idi.

ABİ-nin sədri, AMEA-nın müxbir üzvü, Xalq artisti Firəngiz Əlizadə giriş sözündə ittifaqda uşaq musiqisi və gənclərin musiqi-estetik tərbiyəsi bölməsinin fəaliyyətinə toxundu, uşaqlar üçün yazılan əsərlərin əhəmiyyətini vurğuladı.

ABİ-nin katibi Əməkdar incəsənət xadimi, professor Zemfira Qafarova, ABİ-nin Uşaq musiqisi və gənclərin musiqi-estetik tərbiyəsi bölməsinin sədri Əməkdar incəsənət xadimi, professor İmruz Əfəndiyeva, Əməkdar incəsənət xadimi, sənətşünaslıq üzrə fəlsəfə doktoru Elnarə Dadaşova, sənətşünaslıq elmləri doktoru Leyla Zöhrabova, Raya Abasova, Xırdalan şəhər 11 nömrəli Musiqi məktəbinin müəllimi Sevinc İbrahimova və sənətşünaslıq üzrə fəlsəfə doktoru Günel Zeynalovanın məruzələri dinlənildi.

Bədii hissədə Elnarə Dadaşova, Mehriban Əhmədova, Məryəm Əlibəyli və Fikrət Əmirovun əsərləri səsləndirildi.

Həmin gün yubiley münasibətilə M.Maqomayev adına Azərbaycan Dövlət Akademik Filarmoniyasında kamera musiqisi konserti keçirildi.

Xalq artisti Fəxrəddin Kərimovun idarəsi ilə Q.Qarayev adına Azərbaycan Dövlət Kamera Orkestrinin ifasında bəstəkarların yeni əsərləri ifa olundu. Əməkdar incəsənət xadimləri Elnarə Dadaşova, Faiq Nağıyev, həmçinin Gülbəniz Abdullayeva, İlham Azmanlı, Azər Hacıəsgərli, Nərminə Nağıyeva, Mürsəl Arazbəyli, Azad Zahid, Tural Məmmədli və İlahə Qismət-Abdullanın əsərləri səsləndirildi.

Bununla da ABİ-nin 90 illik yubiley tədbirləri başa çatdı. Növbəti yubileyləri qeyd etmək diləyi ilə

Səadət Təhmirazqızı

Əməkdar mədəniyyət işçisi

Mədəniyyət .- 2024.- 13 dekabr(№92-93).- S.2.