Yubiley, konfrans, təqdimat...

Bölgələrdən qısa xəbərlər

Şəki-Zaqatala Regional Mədəniyyət İdarəsinin (RMİ) təşkilatçılığı ilə “Nə? Nə zaman? Harada?” adlı intellektual oyun keçirilib. Qax rayon Heydər Əliyev Mərkəzində təşkil edilən yarışda regional idarənin əhatə etdiyi altı rayon təmsil olunub. Qax komandası I, Şəki II, Qəbələ III yeri tutub. Qalib komandalar fəxri fərmanla təltif edilib.

***

Şəki-Zaqatala RMİ və Şəki şəhər 2 nömrəli Uşaq musiqi məktəbinin birgə təşkilatçılığı ilə “Vətənim Azərbaycandır” adlı tədbir keçirilib. Şəki şəhər Heydər Əliyev Mərkəzində təşkil edilən tədbirdə vətənpərvərlik mövzusunda milli musiqi nümunələri və Vətəni tərənnüm edən şeirlər səsləndirilib. Tədbirdə şəhid anaları da iştirak ediblər. Onlar deyiblər ki, övlad itkisi ağır olsa da, şəhidlik mərtəbəsinə yüksələn övladları ilə fəxr edirlər.

***

Neftçala rayon Mərkəzi Kitabxanasında mərhum həkim, rəssam Qəmbər Əlizadənin xatirəsinə həsr olunan “Mənim ömür günəşim” kitabının təqdimatı olub. Kitabxananın metodika və biblioqrafiya şöbəsinin müdiri, Azərbaycan Yazıçılar Birliyinin üzvü, “Gündoğar” qəzetinin baş redaktoru Bədirə Rza Həsənqızının kitabında gənc yaşında dünyadan köçmüş həkim və rəssam haqqında şeir, esse və məqalələr yer alıb.

***

Şabran rayon Heydər Əliyev Mərkəzində Naxçıvan Muxtar Respublikasının 100 illiyi münasibətilə elmi-praktik konfrans keçirilib. Çıxış edənlər Naxçıvanın tarixi haqqında geniş məlumat veriblər. Diqqətə çatdırılıb ki, Ulu öndər Heydər Əliyevin sədrliyi ilə keçirilən muxtar respublika Ali Sovetinin 1990-cı il 17 noyabr tarixli sessiyasında ilk dəfə olaraq Azərbaycan Xalq Cümhuriyyətinin (1918-1920) üçrəngli bayrağı Naxçıvan MR-in dövlət bayrağı kimi qəbul olunub. Sonda qısametrajlı film göstərilib.

***

Qazax-Tovuz RMİ Tovuz rayon üzrə mədəniyyət müəssisələrinin birgə təşkilatçılığı ilə Xalq şairi Nəbi Xəzrinin (1924–2007) 100 illik yubileyinə həsr olunmuş “Nəğmə dolu ömür payı” adlı tədbir keçirilib. Bildirilib ki, Nəbi Xəzri Azərbaycan ədəbiyyatında özünəməxsus rol oynamış görkəmli söz ustasıdır. Onun doğma torpağa bağlılıq aşılayan poeziyası dərin ifadə tərzi və həyata fəlsəfi münasibəti ilə səciyyələnir. Tədbirdə şairin sözlərinə bəstələnmiş mahnılar səsləndirilib, kitablarının sərgisi təşkil olunub.

***

Masallı rayon Mərkəzi Kitabxanasında görkəmli bəstəkar, Xalq artisti Şəfiqə Axundovanın (1924–2013) 100 illiyinə həsr olunan tədbir keçirilib. Çıxışlarda qeyd olunub ki, Şərqdə opera (1972-ci il, “Gəlin qayası”) yazan ilk qadın bəstəkar kimi tarixə düşən Şəfiqə Axundova musiqi mədəniyyətimizdə mühüm xidmətlər göstərib. Bəstəkarın “Sevgilim”, “Vətən məhəbbəti”, “Nə gözəldi kəndimiz” və s. populyar mahnıları, müxtəlif janrlı digər əsərləri musiqi xəzinəmizi zənginləşdirib.

***

Salyan Tarix-Diyarşünaslıq Muzeyində “İnsanlara hürriyyət, millətlərə istiqlal!” mövzusunda tədbir keçirilib. Ziyalıların, tarixçi və mədəniyyət işçilərinin iştirakı ilə keçirilən tədbir Xalq Cümhuriyyətinin qurucusu Məhəmməd Əmin Rəsulzadənin (1884-1955) 140 illiyinə həsr olunub. Çıxışlarda Rəsulzadənin XX əsrin əvvəllərində Azərbaycanda müstəqillik idealının gerçəkləşdirilməsi və milli məfkurənin dirçəldilməsi yolunda göstərdiyi xidmətlərdən danışılıb, onun publisistik, ədəbi-tənqidi irsinin Azərbaycanın ictimai fikir tarixində xüsusi yer tutduğu bildirilib. Rəsulzadənin həyat və fəaliyyətindən bəhs edən videoçarx nümayiş etdirilib.

***

Masallı Tarix-Diyarşünaslıq Muzeyində “Bəşəriyyətin sosial bəlası olan narkomaniya və digər zərərli vərdişlər” mövzusunda tədbir təşkil edilib. Mövzuya dair, “Ağ ölümə yox deyək!” adlı tədbir isə Yardımlı rayon Heydər Əliyev Mərkəzi və rayon İcra Hakimiyyətinin birgə təşkilatçılığı ilə keçirilib.

***

Qəni Vəliyev adına Lənkəran şəhər Mədəniyyət Mərkəzinin özfəaliyyət kollektivləri Fövqəladə Hallar Nazirliyi Mülki Müdafiə Qoşunlarının Lənkəran şəhərində yerləşən hərbi hissəsində nazirliyin yaradılmasının 19-cu ildönümü münasibətilə təşkil olunan bayram tədbirində iştirak edib. Kollektivlərin təqdim etdiyi musiqi nömrələri alqışlarla qarşılanıb.

N.Məmmədli

Mədəniyyət .- 2024.-20 dekabr(№94-95).- S.4.