İllər öncə
qəzetlər nədən yazırdı?
Milli Kitabxananın dövri mətbuat arxivindən (31)
İllər öncə, çap mediasının
informasiya vasitəsi kimi aparıcı rol oynadığı,
Lenin yoldaşın dediyi kimi, qəzetlərin kollektiv təbliğatçı,
təşviqatçı, hətta kollektiv təşkilatçı
olduğu dövrdə, qəzet redaksiyaları müxtəlif
mövzularda dəyirmi masalar (o vaxtlar “dəyirmi stol” deyirdilər),
ictimai müzakirələr təşkil edirdi. “Mədəniyyət”
(eləcə də “Ədəbiyyat”) qəzetinin sələfi
sayıla biləcək “Ədəbiyyat və incəsənət”
qəzetində (Mədəniyyət Nazirliyi və Azərbaycan
Yazıçılar İttifaqının birgə mətbu
orqanı) də belə müzakirələr keçirilirdi.
Mətbuat xronikasında bu dəfə 41 il əvvələ
qayıdırıq. “Ədəbiyyat və incəsənət”
qəzetindən seçmələr. Dövrün
orfoqrafiyası saxlanılıb...
Müasirlik və tarixilik: son dövr tarixi nəsrimiz
haqqında
Bu günlərdə “Ədəbiyyat və incəsənət”
qəzeti Nizami adına Ədəbiyyat İnstitutu ilə
birlikdə son illərdə yaranmış tarixi nəsr əsərlərinin
“dəyirmi stol” ətrafında müzakirəsini
keçirmişdir.
Müzakirəni respublika Yazıçılar
İttifaqı tənqid və ədəbiyyatşünaslıq
bölməsinin rəhbəri, filologiya elmləri doktoru
Yaşar Qarayev giriş sözü ilə
açmışdır. Filologiya elmləri namizədi Akif
Hüseynov müzakirə olunan mövzu ilə əlaqədar
məruzə etmişdir.
Sonra filologiya elmləri doktoru, professor Qulu Xəlilov,
respublika EA-nın müxbir üzvü Mahmud İsmayılov,
filologiya elmləri namizədləri Vilayət Quliyev, Rəhim
Əliyev, Vəli Osmanlı, Şamil Salmanov, Şirindil
Alışanov və Nazif Qəhrəmanov
çıxış etmişlər. Ədəbiyyat
institutunun direktoru, respublika EA-nın müxbir üzvü
Əziz Mirəhmədov söhbətə yekun vurmuşdur.
“Əİ”nin gündəliyi
Oktyabr (Bakının indiki Yasamal rayonu – red.) Rayon
Partiya Komitəsində partiya-təsərrüfat fəalları
və partiya veteranlarının “Azərbaycanfilm”
studiyasının “İlıq dənizdə buz
parçası” (ssenari müəllifi Pavel Fin,
quruluşçu rejissor Yuli Qusman, quruluşçu operator
Valeri Kərimovdur) televiziya filminin yaradıcı heyəti ilə
görüşü olmuşdur. Görüşü giriş
sözü ilə Oktyabr Rayon Partiya Komitəsinin birinci katibi Səyavuş
Əliyev açaraq partiya veteranlarının keçdiyi
şanlı həyat yolundan danışdı, ədəbiyyat
və incəsənət işçilərinə bu mətin
insanların həyat və yaradıcılığını
əks etdirən yeni-yeni əsərlər yaratmağı
arzuladı.
Kinostudiyanın direktoru Cəmil Əlibəyov onun
“Qış macəraları” povesti əsasında
yaradılmış bu filmdə qocaman kommunist obrazını
canlandırdıqları üçün filmin
yaradıcılarına minnətdarlığını
bildirdi.
Baş rolun ifaçısı Həsən Turabov əməksevər,
prinsipial, mətin qocaman kommunist, partiya veteranı usta Nəzər
obrazına necə məhəbbətlə
yanaşdığını və bu rolun onun
üçün müqəddəs olduğunu dedi.
Əsas rollardan birinin ifaçısı Həsən
Məmmədov da film üzərindəki işindən
danışdı.
Film ekranda canlandırıldıqdan sonra müzakirələr
başlandı. 1920-ci ildən Sov.İKP üzvləri –
respublika İnqilabi Şöhrət Şurasının sədri
Bahadur Rzayev, tarix elmləri doktoru, Azərbaycan Dövlət
Universitetinin professoru Yusif Yusifov, qocaman kommunist, tədqiqatçı
Qulam Məmmədli, teatrşünas İlham Rəhimli, 1
nömrəli tikiş fabrikinin işçisi Səyyarə Cəfərova
öz təəssüratlarını söylədilər.
Axırda S.Əliyev partiya veteranları adından
yaradıcı heyətə təşəkkürünü
bildirdi.
***
D.Bünyadzadə adına Azərbaycan Xalq Təsərrüfatı
İnstitutunda (indiki Dövlət İqtisad Universiteti – red.)
aşıqlar gecəsi keçirilmişdir. Gecədə
institutun dosenti V.Məmmədov aşıq sənətinin ədəbiyyatımızın
inkişafında oynadığı roldan
danışmışdır.
Respublika Aşıqlar Birliyinin sədri, şair H.Arif
aşıqların IV qurultayına hazırlıqla əlaqədar
görülən işlər barədə məlumat
vermişd.
İnstitutun Azərbaycan dili kafedrasının
müdiri M.Əliyev aşıq şerlərinin xüsusiyyətindən
söz açmışdır.
Gecədə Aşıq Alı adına Bakı
aşıqlar ansamblının üzvlərindən R.Məmmədov,
U.Quliyeva, A.Həsənov, Ə.İbrahimov, balabançalan
Ə.Cavadov çıxış etmişlər.
“Ədəbiyyat və incəsənət” qəzeti,
16 dekabr 1983-cü il
Mədəniyyət .- 2024.-20 dekabr(¹94-95).- S.6.