Azərbaycan ədəbiyyatının dünya ədəbi platformalarına inteqrasiyası

AYB-də dinləmə keçirilib

Fevralın 21-də Azərbaycan Yazıçılar Birliyində (AYB) “Azərbaycan ədəbiyyatının aparıcı dünya ədəbiyyat platformalarına inteqrasiyası” mövzusunda dinləmə keçirilib.

Azərbaycan Ədəbiyyat Fondu və Dünya Yazıçılar Təşkilatının (The World Organization of Writers) birgə təşkil etdiyi tədbirin məruzəçisi təşkilatın rəhbəri, əslən Qazaxıstandan olan rusiyalı şair, ədəbiyyatşünas, naşir Marqarita Al (Almuxametova) olub.

AYB sədrinin müavini, Azərbaycan Mətbuat Şurasının sədri Rəşad Məcid, birliyin beynəlxalq əlaqələr üzrə katibi Səlim Babullaoğlu, AYB-nin katibi Elçin Hüseynbəyli çıxış ediblər. Çıxışlarda ədəbiyyatımızın beynəlxalq müstəvidəki yeri, həyata keçirilmiş və görüləcək işlər diqqətə çatdırılıb.

Marqarita Al məruzəsində bildirib ki, rəhbərlik etdiyi təşkilatın əsas məqsədi dünya yazıçılarının yaradıcı səylərinin dünyada humanitar sferanın gələcəyi uğrunda birləşdirilməsi, mədəniyyətin, ədəbiyyatın, mənəvi dəyərlərin sabitliyin qorunmasında həlledici rolunun təmin edilməsidir.

Azərbaycan Dünya Yazıçılar Təşkilatı üçün xüsusi statuslu bir ölkədir. Təşkilatın yaranması ideyası 2019-cu il oktyabrın 1-də BMT-nin himayəsi, Avrasiya Millətlər Assambleyasının və Heydər Əliyev Fondunun həmtəşkilatçılığı ilə Bakıda keçirilən LiFFt Festivallar Festivalı zamanı gündəmə gəlib. Festivalda Marqarita Al və dünyaşöhrətli yazar Oljas Süleymenov belə bir böyük əhatəli ədəbiyyat təşkilatının yaranması zərurətini səsləndiriblər. 2023-cü il fevralın 2-də Qahirədə 17 ölkənin nümayəndələri Ümumdünya Yazıçılar Təşkilatının memorandumunu imzalayıblar. Hazırda təşkilatda 69 ölkənin yazarları təmsil olunur.

Bu il aprelin 4-6-da Nigeriyanın paytaxtı Abudja şəhərində təşkilatın “Biz eyni planetin insanlarıyıq” devizi altında ilk konqresi keçiriləcək.

Təşkilat rəhbərliyinin Bakıya gəlişinin səbəbləri Azərbaycan ədibləri ilə əməkdaşlıq əlaqələrinin qurulması, eyni zamanda Azərbaycan yazıçılarının dünyanın böyük ədəbiyyat platformalarında təmsil olunmasını təmin etməkdir. Qonaqların AYB sədri Anarla da görüşündə bu barədə söhbət açılıb.

Dünya Yazıçılar Təşkilatı beynəlxalq müsabiqələrdə 4 dil üzrə işçi qrupu formalaşdırır. Bunlar ingilis, rus, ispan və ərəb dilləridir. Bakıda görüşlərdə Türk dünyasının bu dillər arasında təmsilçiliyi məsələsi qaldırılıb.

Mədəniyyət .- 2024.- 23 fevral,№(15).- S.3.