III Milli Yaylaq
Festivalı nə ilə yadda qaldı?
5-7 iyul tarixlərində Göygöl rayonunda III Milli
Yaylaq Festivalı keçirilib. Festival “Cavad xan” Tarix və Mədəniyyət
Fondu ilə “Kap.az” – Fərqli Turizm MMC-nin təşkilatçılığı,
Dövlət Turizm Agentliyi, Gənclər və İdman
Nazirliyi, Türk Əməkdaşlıq və Koordinasiya
Agentliyi (TİKA), Dünya Etnoidman Konfederasiyası, Gəncə
şəhər, Göygöl rayon icra hakimiyyətləri,
Dövlət Məşğulluq Agentliyi və Kiçik və
Orta Biznesin İnkişafı Agentliyinin (KOBİA) dəstəyi
ilə gerçəkləşib.
Xan yaylağında təşkil olunmuş
festivalın açılış mərasimində iştirak
edən gənclər və idman naziri Fərid Qayıbov,
Türkiyənin Gəncədəki baş konsulu Recep
Öztop, Göygöl rayonunun icra başçısı Elvin
Paşayev və digər rəsmilər qurulan guşələrə
baş çəkiblər.
Jurnalistlərə açıqlama verən Fərid
Qayıbov tədbirin yüksək səviyyədə təşkil
olunduğunu vurğulayıb: “Bir sıra ölkələr
burada öz mədəniyyətini nümayiş etdirir.
Ərazidə əla ab-hava var. Festivalda milli adət-ənənələrimiz
və müxtəlif idman növləri nümayiş olunur”.
Festivalın ikinci günündə ustad dərsləri,
yarış və müsabiqələr, oxatma təlimi, milli
güləş, zorxana, kəmər güləşi təlimləri,
milli rəqslər, aşıqların deyişməsi, konsert
və tamaşalar təqdim olunub.
Üçüncü gün isə möhtəşəm
konsert proqramı ilə yadda qalıb.
Festival zamanı Xan yaylağında orijinal üslubda
“Yaylaq yurdu” adlı etnoqəsəbə yaradılıb. Burada
yaşayış yurdları (alaçıqlar) ilə
yanaşı, Cıdır meydanı, “Yaylaq bazarı”, “Sənətkarlıq
guşəsi”, “Dədə Qorqud ocağı” (tamaşalar
üçün səhnə), “Pəhləvan meydanı”
(yarış sahəsi), “Aşıq Ələsgər
ocağı”, “Yaylaq süfrəsi” və digər tematik sahələr
iştirakçıların ixtiyarında olub.
Festival şərti olaraq üç hissədən
ibarət olub: mədəni-etnoqrafik hissə, milli yaylaq (idman)
oyunları və eko-etnoturizm. Etnoqəsəbənin ərazisində
el şənlikləri təqdim olunub. “KOB Fest” sərgi-yarmarkası
da təşkil edilib. KOBİA-nın təşkilatçılığı
ilə keçirilən yarmarkada KOB subyektləri tərəfindən
hazırlanan şəbəkə sənəti, rəssamlıq,
xalçaçılıq, taxta oyma, milli musiqi alətləri
nümunələri və müxtəlif əl işləri
maraqla qarşılanıb.
Qeyd edək ki, xaricdən çoxsaylı qonaqların
da qatıldığı Milli Yaylaq Festivalı ilk dəfə
2019-cu ildə Gədəbəy rayonunda, ikinci dəfə
2022-ci ildə Göygöl rayonunda keçirilib.